Пайда бергбараш юкъедоаладарах, керда наькъаш хьакхолларах хьоахадергда кхетаче. Экономикацара санкцеш хьокхаелча а шоай гӀулакх ца талхийташ, чухьарча экономикан хьал тоадеш, лакхдеш болх чакхбаккхарах дувца лерхӀ цига. Цу оагӀонцарча говзанчаша теркалдечох, КИФ-2025 моттигерча мехкаша керда, беркате наькъаш хьаделлара тӀехьа лоархӀаме моттиг дӀалоацаш хила еза. ГӀибухен оагӀонга гӀолла Еврази, Инди, Юхера Малхбоале вӀашкаозара тӀехьа Къилбаседа Кавказо дӀахьоча балха йоккха терко ергья цига. Цунга хьежжа, тайп-тайпара цу оагӀонцара проекташ гойтаргья цига. РФ Паччахьалкхен кулгалхочун заместитела Новак Александра белгалдир, Кавказерча инвестицей кхетачено массахана ший къахьегама программа йоаржаеш, шеръеш къахьегилга. Бизнесменаш, инвестораш вӀашкаоазаш, царна юкъера бувзам чӀоагӀбеш йола 50 лоархӀаме кхетаче дӀаяхьа лерхӀ укх шера.

«Гойтама программан юкъе хургда Къилбаседа Кавказерча наьха культураца, оамалашца, Ӏадаташца дувзаденнараш, цу моттигашка проекташ йоаржаеш дӀахьоргболча балхаца дувзаденнараш. Дог тийша ва со, КИФ бизнеса, Ӏаьдала юкъарча гӀулакхех дувцаш моттиг хургйолга; кхетаче дӀаяхьара бахьан а из да», -  аьлар Новак Александра.

Белгалде деза, таьрахьашка далар тахан керттера моттиг дӀалоацаш долга. Паччахьалкхен моттигашка цу оагӀонца дувзаденнараш юкъедоаладар, электронни оагӀонца каьхаташца болх дӀабахьар, хьакхелла хьаькъал чудоаллача хӀамашца тайп-тайпарча моттигашкара болх аттагӀа бар да теркаме оттадер.

Йоккха программа я КИФ-25 чуйоагӀар. Цу юкъе я кхетаченаш, тематически сессеш, бизнесменаш, политикаш юкъе болаш дӀакхахьа деза къамаьлаш, дешара, спорта, салоӀама оагӀонашца дувзаденнараш. Укх шера Сийлахь-боккхача тӀема юкъе Котало яьккха 80 шу дизар дездеш ба вай мохк. Массане теркалдергдолаш ди да из. Хоамий политика юкъелоацаш, истори довргдоаца, диуцлургдоаца болх дӀабахьара тӀехьа да вай; цудухьа 1941-1945-ча шерашка лаьттача тӀема истори даиман дийна хилийтара тӀехьа терко ергья кхетачен доакъашхоша. Тахан хьадаьржача кердадарашта юкъе а дакъа лоацаргда гулбеннараша, кердадарех дувцаш йолча семинаре хила аьттув хургба массане. Эггара йоккхагӀа терко ергьяраш- геобрендинг, PR-оагӀув, маркетинг, бизнес, паччахьалкхен моттигаш вӀашкаозарца дувзаденнараш. КъонагӀа болча доакъашхошта лоархӀаме хийттарех да туризм йоаржаяр. Россе кагирхоша дезаденна тӀаэцаргдола туризмаца, экономикаца дувзаденна керда наькъаш довзийтаргда КИФо. «Паччахьалкхен,бизнеса, тайп-тайпарча оагӀонашкарча балхех болча говзанчаша юкъара моттиг дикагӀа тоаеш дола гӀулакхаш теркаме лоацаргда кхетаче.

Хьалкхувш латтача тӀехьено пайда эцаргбараш, Кавказерча мехкашкара хьал тоадергдараш да цу боккхача балха юкъе эггара керте оттадераш», - белгалдир Росконгресс Ганза кулгалхо, КИФа кулгалхо волча Затынайко Владимира.