«Сага вахар - Российски Федераце Конституце лорадеш дола эггара лакхагӏа мах бар да. Саг вер - из эггара халагӀа дола зулам да, цунца къовсам лоаттабар керттера декхар да паччахьалкхен политикан»,- аьлар Хьулахой ГӀапура. Цо белгалдир, дукхагӀа йола моттигаш - из иштта оалаш дола «вахарера валар» нийслуш яраш я; уж да, дукхагӀа цхьана корта бохабу малар а менна вагӀача моттиге, нийслуш дола къовсамаш. Цар бахьанаш дӀадолалуш хул хьагӀ, эгӀазло, шийна пайда баккхара цӀаьрмата хиларгара. «ХьагӀ йолаш даь зуламаш тӀехьа йоккха лар йолаш хул, уж тахан а долаш да», - аьлар криминалиста.

ХалагӀа дола зуламаш тохкаш, геттара кийчо яь, къайладаьккха зулам даьча моттиге болх дӀабахьа безаш хул тохкамхой, шоай мел бола низ оарцагӀбаьккха. Хьулахой Гӏапура дийцар таханарча заман хьалашка из болх шоаш мишта бу. Цар юкъебоаккх криминалистически гӏирс, мобильни криминалист, кхелахочоа сердал луш йола таронаш, хӀама хьахозийташ бола гӀирс, аьшка хӀамаш лохаш дола кечалаш, къайлагӀа камераш йий гойташ йола таронаш, иштта квадрокоптер.

Цу таронаша дикка новкъостал ду, тохкама болх дӀахьош.

Болх дика дӀабахьарах дувцаш, цо цхьа масал доаладир, карарча шера саькура бетта балха тӀа нийсденна. «Из дар республикан вахархо верах, Наьсарен кхален тохкама даькъе хьадийлла хинна гӀулакх. Болх дӀахьош хиннача моттигера корайир тепча «ПММ», травматически герзах тӀема 9 мм йола поатронаш етташ дола герз хьадаьдар. Кхелахочун новкъосталца цу тӀара корайир бехке веш волчун пӀелга лар, из къаьстта цун йолга хьагойтар дактилоскопически экспертизо. Цул совгӀа, цу герза тӀара корайир хьоцара хьаьна лар, из цун хилар чӀоагӀдир экспертиза дӀахьош» - аьлар Хьулахой ГӀупура.

Цо таро елар; из саг бехкеве, иштта дӀахо тахкара суде уголовни гӀулакх дӀадахьийта.

Къаьстта доккха даьржа хилар Наьсарен-Шахьаре къиза ши саг вийна хьал. Кӏоаргга болх дӀабахьарах, лоаццача хана из саг хьалаьцар, цунца цу моттиге болх дӀабихьар, цо хоадам болаш хьадийцар зулам даьр ше волга; моттиг а ше уж нах боабеш хинна гӀирс а гойтар. Тохкам дӀахо дӀахьош ба, цу зулама бахьан дӀахо довзара болх кхы а бе безаш ба.

ДукхагӀа дола вахарера хьалаш бахьан долаш нийсденна зуламаш техка даьннад; царна юкъе нийсбеннараш шоай бехк тӀаийца а баьннаб. Е уголовни гӀулакхаш хьадийллад царна духьала, е уж чакхдала доахк.

«Оаха дӀахо а йоккха терко лоаттаергья цу тайпара нах боабара даькъ тӀа дӀабахьа безача балха, эшаш бола низ а хьалаш а долаш да: балха говзал лакха йола болхлой, таханарча заман хьалаш, техника. Керттердар да - тешал деча нахаца дӀабахьа беза чоалхане болх, иштта хьем боаццаш лахара болх дӀахьош болча болхлошца бувзам лелабар», - аьлар Хьулахой ГӀапура.

Цо таро лургья; зуламхошца къовсам лоаттабе, наьха бокъонаш лорае.

ГӏалгӀайчен тохкама комитето хьагойт профессионализма лакха боарам, цо ший аргӀагӏа таро лу республике кхерамзлен Ӏалашо е. Газета редакци тешаш я, бокъонаш лораерашеи юкъара болх берашеи цхьана; унзара зуламаш дар лаьгӏдергда, аьнна.