ТIема аренашка лийгараш вайна дагабохийташ дола ди да из. ТIема котало кхаьча 80 шу дузаш,  укх шера эггара хьалха хьаллаьцаб вай мехка Ерригача Россе болам - «КIайча гIарагIурай Ди». Цу кхетаче гулбеннабар Iаьдала болхлой, кагирхой, мехкарча Россе тохкама оагIон къахьегамхой, иштта кхыбараш а.

Тохкама оагIонна кулгалдеш волча Асхабов Ахьмада, иштта цунцарча новкъосташа зизаш дехкар Наьсарерча массаза йоагаш йолча цIера юхе.

Сийлахь-боккхача Даьймехка тIема аренашка моастагIа вохавеш, чугIорта дагадохарах дехкевоаккхаш, коталон ди гаргадоаладе гIерташ, лаьттараш дагабехар цу дийнахьа.

Болам хьаллаца арабаьлар Кадетски корпусе дешархой. Лоа санна кIай ахкаргаш урагIхийцар цар сийнача сигала. ЦIена, дог тохадолийташ екар берий оазаш; машара хам хоболийташ яр шоай кулгашца цар хьаяь кIай гIарагIурилгаш.

Тохкама оагIонцарча кхалнаьха тоабо «Царех хьахилар кIай гIарагIураш» яха болам дIабихьар Магасе. Селий поэта Гамзатов Расула юкъедаккха деза аьнна хьоахадаь ЦIай, тахан берий байташа тоадир. Хиннар дицде йиш яц вай, цунга хьежжа кхувш латтача тIехьен довза деза шоай Даьхен истори, цун сийдола, яхь йола къонгаш.

«КIайча гIарагIурай ди» - ноахалашта юкъера исторецара тIий да. Тахан болам хьаллаца арабаьлар зIамига, боккха мел бараш. Даьхен истори деза да хIара дега, из лорадеш дIаходахьар вайх хIаране декхар а да!