Къаман пхьоала дозал
«Даьхе бахьан» яхача боламе-фестивале дакъа лоацаш ба мехкара говзанчаш
Боккхача тӀема Коталон 80 шу дизара хетабаь баьржа болам-фестиваль хилар селий мехка. Вай боккхача мехка культуран оагӀонцара хозагӀдараш гойташ бола, хӀамай кӀоаргал йовза, тайп-тайпарча моттигашкара дукха нах гулбеннабар цу кхетаче. Махачкалерча Стальски Сулеймана цӀи лелаеча доазон тӀа боаржабир «Говзанчий артель» яха гойтам. Ерригача Россера тӀабаьхкача говзанчаша тамашийна хоза балхаш довзийтар цига, юстара бисанзар вай мохк а.
«Гойтаме гулбеннараша цу сахьате зийра вай лакха начӀал дола говзанча Имагожанаькъан Мадина. Фестивале гулбеннача хьаьшашта боккха тоам беш дар цун балхаш. Къаман дувхарца кийчъяь йолча, тамашийна хоза яьча теникашка хьожаш бар берригаш. ХӀара теникаца къаман беркате Ӏадаташ гойта хьежаяр Мадина. Иштта бӀарг тӀаотташ яр цо хьаяь берий къаман костюмаш. ГӀалгӀай къаман кхоллама оагӀон дуне мел боккха чулоацам, кӀоаргал йолаш да дайра гулбеннарашта. Костюмий бос кхы а дикагӀа тоабеш дар кулгашца хьадаь тӀехкараш.
Гуш дар, хьинаре къахьегаш, дукха болх беш уж хьадаь долга», - дийцар «Сердалога» Республикерча Къаман кхоллама ЦӀен кулгалхочун гӀонча йолча Котанаькъан Марема. Белгалде деза, кхолламцара безам Мадинай дег чу бера хана сомабаьннилга. Дукха хӀама хьакхолларца начӀал дола йиӀиг таьшца моллагӀа хӀама хьае, догам дилла ховш, иштта хӀамаш вӀашагӀъехкача кружоке ухаш, исбахьален, мукъама ишколашка ха дӀахьош хьалкхийра. МоллагӀа хӀама хьаийца, цох цхьа башха хозал хьакхолла начӀал деннад цунна Дала.
Цо баь цхьа болх- цӀилеторгех хьадаь Шолжа-Шахьар тӀара маьждиг тахан шахьарерча музее латташ да. Мехкарча берий театра шоай балхаца лелае теникаш хьаеш дизза ялх шу даьккхад Мадинас. Театрерча архиве тахан болаш ба из боккха болх. Ший нанас Шолжа-ГӀалий тӀа хьайийллача хӀамаш тегача цехе Ӏомаелар Мадина маха баккха. Цу хана денз, из гӀулакх дезаденна хьайоагӀа из, цу балхацара говзал «ГӀалгӀайче» яхача къаман халхара ансамбле дӀахохьош. Шийна гонахьа мел долча хӀаманцара хозал зе Ӏемай Мадина.
МоллагӀча хӀамах боккха, хоза болх вӀашагӀболла хов цунна тахан. Къаьнарча сурташка хьийжа, дагадехар цунна берий къаман дувхара «Чокхи» яха проект вӀашагӀ йолла. Берий 12 костюм я цо хьатийгараш. Къаман культураца, истореца дувзаденнараш массахана дийндеш хила везилга белгалду цо ший балхашка. Ший говзалца вай дегашта тоам беш, къаман хозагӀа бола оагӀув массайолча моттигашка дӀагойташ; хьинаре, боккхача безамца тамашийна дола балхаш хьакхоллаш; хьайоагӀа вай мехкахо.
«Даьхе бахьан» яха Мадинас дакъа лоацаш йола фестиваль ший болх дӀахохьош я. Культуран оагӀонцара из доккха цӀай лоархӀаме, белгала хургда дуккхача къамий вахаре. Фестивала керттера декхар да къаман хӀама цадайтар, кхоана ураоттаргйолча тӀехьенга Ӏадаташца лорадеш хьаденар дӀакхачийтар, беркате кхоллам исторе дуккхача шерашка бахийтар.
