Юрташка, шахьарашка цу мугӏарера кхетаченаш дӏахьош хилча, бахархоша шоашта къувлараш, кхоачамбоацараш белгалду. Тайп-тайпарча моттигашкара болхлой юкъе болаш хулача вӏашагӏкхетаре дукха хаттараш дашха, тахка аьттув боалл. Россе Президента Путин Владимира россиянаша юкъарча оагӏонцарча гӏулакхашта юкъе дакъа лацарах дувцаш белгалдир, мехка бахаш болча наха хетар, царна эшар лоархӏамеча дакъах долга, хӏана аьлча боккхача мехка дахаш дола вай дерригаш Даьхен хӏама тоадара, лакхдара тӏехьа дикка къахьегаш, мехках дог лазаш, дикагӏа хургдар доаржадеш дӏадаха дезаш да.

Вай мехкара хьал теркалде эттача гуш да, укхаза бахаш бола нах шоай хӏама дезаш, шоаш бахаш бола юрташ, шахьараш, урамаш ма хулла хозагӏа, дикагӏа хилийтара тӏехьа къахьега ловш болга. Интернета оагӏонашка гӏолла моллагӏа хӏама доаржаде, кхайкаде аьттув бале а; тахан цхьаккха хӏама кхоачаргдац бахархой гулбенна, хӏаране шийна хетар оалаш, пайданегӏа хургда аьнна хетачун тӏехьа соцам беш дӏахьоча кхетаченашка. Мехках, шоай моттигех дог лазаш бола нах а шоайла дикагӏа бовз цига, хӏаранена хетачунга ладийгӏа, нийсагӏа хургдар хьалхадаккха йиш я. Вӏаший тешам хилар а, бувзам лоаттабар а цу юкъедоагӏа. 

Моллагӏча хьакима, депутата, ӏаьдала болхлочун ший балха тӏа чӏоагӏа лоархӏаме да адам цох тешаш, цо яхар хьаллоацаш хилар. Цу хӏаман уйла е еза массахана. Вахарера гӏулакхаш дукха хиларга хьежжа, кхетаченаш а каст-каста дӏакхахьа езаш хул. Царга гӏолла дуккхадараш тоаде аьттув боалл мехка. Масала, цу юкъе да газах, токах, хих дола декхар ханнахьа дӏателар; дешара моттигашкара болх боаггӏача боараме хьаоттабар; иштта кхыдола лоархӏамедараш а. Къаьстта йоккха моттиг дӏалоацаш я цу юкъе наркомани яхача бӏехача зулама духьала дӏакхухьаш йола кхетаченаш.

Тахан вайна гу, наркотикашца базар лелаеш бола зуламхой гучабоахаш, из «дохьаж» дохка эттачара хьалувцаш ӏочукхувлаш, ӏаьдало болх лоаттабелга. Кагирхой цу бӏехача гӏулакхах кӏалхарбаха гӏерташ, наркотикаш мехка лоаттаеш йола моттигаш гучаяхара тӏехьа боккха болх лоаттабеш, ди-бийса ца къовсаш, къахьег цу оагӏонцарча болхлоша. Ма дарра аьлча, адам лорадара тӏехьа дӏахьош болх ба из, вай массане хьаллаца безаш. Тахан массане кхетаде деза, цу бӏехача зулама тӏехьабаьнна, наьха ираз доадеш лелараш къайлакхахьа йиш йоацилга, моллагӏа тешаме ца хета хӏама зийча ӏаьдалга ӏалаьмате чехка хоам бе безилга.

Укх деношка МВД болхлоша Тӏой-Юрта дӏайихьар бахархошцара кхетаче. Наха хьалхадаьккхар, ӏаьдалца массахана бувзам лоаттабе безилга. Цига дакъа лоацаш бар Наьсарен кхален ОМВД, Миннаца, УОООП, ГИБДД, терроризм яхача зулама духьала къовсам лоаттабеча оагӏон болхлой. Наьсарен кхален кулгалхочун гӏонча волча Исмейланаькъан Темарлана дийцар, юртара кхерамзлен хьал лорадара тӏехьа берригаш дакъа лоацаш хила безилга.

Иштта цига баьхка хилар Наьсарен кхален депутатий Совета кулгалхо Эккажанаькъан Идрис, цун гӏонч вола Шоанахой Джабраил, Тӏой-Юртара депутаташ. Цу балха кулгал деш вар МВД Юкъарча Совета хьалха латта Гаданаькъан Муса. Терроризм, экстремизм яхача доккхача зуламех къона тӏехье лораярах, цӏагӏа, дешара моттигашка, маьждигашка цу бӏехача наькъах лоравеш хьехам лоаттабарах дийцар гулбеннараша.

Тахан латтар геттара дукха хӏамаш даьржа, Россех гӏертараш цхьацца зулам доаржаде, кагирхой ӏехабе гӏерта ха я. Интернета оагӏонашка лоралуш хила безилга, терроризм яхача зулама юкъе чуоза гӏертача зуламхошка ладувгӏа, цар яхар цхьаккха тайпара теркалде йиш йоацилгах дувц гулбеннараша. Даьша, ноаноша, хьехархоша, ӏаьдала болхлоша цхьана дӏабахьа беза боккха болх ба из. Иштта кхетаче дийцар тахан наькъашка дукха хатараш хиларах. 

Даьлах кхераш, хьаоттаяь бокъонаш лораеш хила веза хӏаравар! Тӏаккха тоалургда деррига ма хетта. Бӏаьстан денош хьаоттарца къахьегама шоатта, боламаш, тайп-тайпара кхетаченаш дӏакхухьаш хул мехка. Геттара дега тоам беш хул беркате, пайда беш дола гӏулакх хьаллаца ма хулла дукхагӏа адам арадаьлча. Кхувш латтача къонача тӏехьен а дика масал да из. Къаман, мехка хӏама лорадеш, могаш дола дика доаржаде хьожаш, вахар тоадара тӏехьа къахьега ловш хила веза саг. Ший хӏама лоархӏаш, шийна Дала хьаденнача беркатах хам беш, хоастам беш хилар массанеца хила дезаш хӏама да. Вай лерхӏамашка, гӏулакхашка хьежжа хургья къаман кхоане а, кагирхой вахар а. Из деррига кхетадеш, сийдолча, эздийча гӏулакхашкахьа совдоалаш хила деза вай тахан!