Тахан «Гӏоазота кашамаш» оала Дагалоаттама моттиг - из хатар дагалатташ болча наха хьалйизар. Цига гулбелар тайп-тайпара ха яьнна нах, уж бар юкъарча гӏайгӏано вӏашагӏтеха, иштта хургдолча диканга сатувсаш бола бахархой.

Цига нахаца из бала бекъа вера Гӏалгӏайчен Кулгалхо Келаматанаькъан Махьмуд-Ӏаьла, Халкъа Гуллама депутаташ, шоашта керте Гаьгенаькъан Руслан волаш, иштта цига бар  юкъарлон болхлой, дин викалаш, республикан бахархой. Из кхетаче хотталуш яр политически ӏазапа дагалоаттама Денца - цу дийнахьа  берригача мехко бехказло ехаш корта чубохийт тайп-тайпарча исторически ханашка бехк боацаш кхестабаьча наха хьалхашка.

Гулбеннарашка къамаьл деш, республикан кулгалхочо Келаматанаькъан Махьмуд-Ӏаьлас аьлар, хӏаранена дагалатташ дола дешаш. Цо белгалдир, сага вахар деза да, цхьаккха а хӏама хургдац сага валара хьалхашка бехказло еш, цхьанна хӏаманца нийсде йиш яц  бехк боаца нах боабар.

Цо баркал аьлар къоаношта - шоай хьаькъалца, чӏоагӏача деналца, сага ла хала болча наькъах чакх а баьнна, шоай доалахьа мел дар дайна бисача хана, ца бохаш, шоай хьамсара мохк биц ца беш, шоай Даьхенцара безам ца боабеш, сий долаш, шоай дезалашта кхетам луш, уж хьабоагӏаш хиларах, из дагалоаттам  шоай тӏехьенна буташ.

«Из истори дицдар - из да тӏехьа тӏадоагӏа ноахал бакъдолча исторех даккхар, ший мохк, ший къам дицдар. Вай декхар да - исторически дагалоаттам лорабар, из унзара ха кхы юхацаяйтара воашта могар дар. Цхьоагӏо, барт даим хилда вайца, воайла оагӏув хьаллоацаш, кхувш йоагӏача тӏехьен духьа, машар лорабара новкъостал деш хилда вай», - уж дешаш кагирхошка кхайкарал деш санна дар. Вай боккхача, дукха къамаш дахача, шоайла культураш ювзаеннача мехка,  машаре даха ховш хилар, вӏаший лоархӏаш хилар - из я хатараш кхы ца хилийтара цаӏ мара йоаца кӏийле.

Мемориале сатем лаьттар. Хӏаране дагахьа яр ше-ший уйла, сатувсам. Цу хатара юкъе бейнаршта тӏера мовлат дийшар, дуӏаш дир, бехк боацаш бейнарий къинош Даьлагара дехаш. Байначарех Дала гешт долда, Дала къахетам болба!

Цу дийнахьа еррига Гӏалгӏайче вӏашагӏкхийтар, зӏамигавар а воккхавар а. Культуран Цӏеношка книжкай гойтамаш хьадийллар, тематически сайренаш дӏайихьар. Республикан ишколашка дагалоаттама урокаш, классера сахьаташ дӏадихьар, цига берашта дийцар машара, барта мах барех. Республикан шахьарашка, юрташка бейнараш дагалаьца сагӏа дир, из дӏадийкъар таро йоацача наха, бошта, цунца кхачан даараш а делар.

Дагалоаттам кхерах даьча чурта тӏа лаьтта ӏац, из бахаш ба дикача гӏулакхашка, воайла хьаллоацаш, новкъостал деш хиларца, хьамсарча мехка машар лорабеш хиларца.