Боккъонца дола цIай дир ший дешархошта цу дезача дийнахьа къонача хьехархочо Белхарой Залинас. Ший цIенача дег чура дика совгIат дир цо кIаьнкашта а йиIигашта а.

«Тхо тхоай классе хьадаьхкача, Залинас тхона елар мерза хIамаш, ахкаргаш, цо иштта дийцар массаболча бусалба наха Рамадана бутт мел лоархIаме а беза а ба», — аьлар зIамигача Амина ше «Сердало» газета корреспондентаца къамаьл деш.

Белхарой Залина болх беш я МагIалбикерча № 18 йолча ишколе. Цо хьехача 1 «в» классе дагIача берий дай чIоагIа раьза ба, шоай бераш къаьстта цунга кхаьча. Ше къона хиларга хьежжа доацаш, Залина хинна яьнна хьехархо я. Цо, берашта хьехарал совгIа, цар ишколе дIахьош йола ха безаме а пайдане а ю. Цо Iомаду бераш дика гIулакхаш леладе, шоайла безаме хила, боккхагIбараш лархIа, эшача новкъостал де.

Цо каст-каста дIахьош йолча кхетаченашка берашта эшаш бола хьехам лу, цар Iомаду бераш дикача сага оамалах хила. Тхоай бераш ишколе дIадохийташ, тхох хIаравар паргIата ва. Ховш да цхьаккха цун терко йоацаш вуссаргвоацилга«, — йоах зIамигача Амина дас.

Беза мархий бутт лаьцача хьалхарча дийнахьа, Белхарой Залинас дIадихьа цIай вIалла а дага дацар хургда аьнна берий даьшта. Цу берий даьшкара хIама ца дехаш, шийгара кийчдаьдар цо деррига, цхьаккха витанзар совгIат доацаш.

Бакъда декхарийла-м зIамигабараш а бисанзар. Цар, хоза а хеташ, йийшар мархий беттах лаьца байташ, цхьабараша, масала, Амина кхыметтел ламаза дешаш а Даьлага дуIа дар а шийна мишта хов гойтар.

Цу тайпара бераш классе кIезига дацар. Цар хьехархочунна ца ховш дац, къайле яц из. Цхьан йиIига, из цIай долаш, цо деза КъорIа делар, цунна ховра ший дешархо из деша ховш йолга.

«Рамадан хье волчул дикагIа хила веза ха я», — иштта аьннадар Белхарой Залинас ше дIайихьача кхетаченах. ХIаране цигара хьаийцар — Рамадан бутт наьха дегаш сердалах, дикалах, сатемах, цIенача уйлаех хьалдуза ха хилар.

ХIара сага мел даь дика гIулакх цунга юхадоагIаргда доккхача совгIатаца. Иштта юхадоагIалда из ший зIамига дешархой дукха безача Белхарой Залинайга а.