Кагирхой, берий «Хьалхарбарий болам» яхача оагӏоно укх бӏарччача шера къахьегаш кхоачашдаьрех дийцар цу оагӏонцарча кхетаче. Шолжа кхален, Шолжа шахьара моттигашка цу оагӏонцарча балха хьалха латтача Коазой Сайт-Мухьаммада белгалдир, укх тӏехьарча кхаь шера дикка лоархӏаме йола проекташ йоаржае аьттув баьннилга. 

Кхувш латтача тӏехьен Даьхенцара безам, лерхӏам чӏоагӏбарах йола проекташ я уж, ма дарра аьлча. Хӏаьта къаьстта йоккха терко е езарех да студенташа дакъа лоацаш дӏахьош дола тӏема оагӏонцара «СПОртанций» ловзар. Кагирхошка дукха хӏама шаьрдайташ, дукха хӏама довзийташ ловзар да из. Иштта шахьара вӏашагӏъеллай «Кибер-Хьалхарбараш» яха, кхерамзлен оагӏонца дувзаденнараш лорадарах йола проект. Шоаш дешаш мел ӏомадаьр, балхаца дӏагойта аьттув бар цига дешархой. 

Къаьстта йоккха дегагӏоз кагирхошта еш хилар, кагирхой гӏулакхех йолча Комитета республикерча Хьалхарбарий оагӏонца вӏашагӏъелла КВН. Массабараш раьза болаш, массане дог айдеш кхетаче хилар цох, хӏаране ший говзал гойта гӏерташ. «Профэкспедици» яхача проектага гӏолла тайп-тайпарча моттигашка кхетаченаш дӏакхухьаш хилар къонабараш. Республикерча моттигаша шоай болх мишта дӏахьу дайзар царна, цигарча говзанчашца къамаьл хилар цар. Белгалде деза, къонача эскарахошта экологеца дувзаденнараш довзийташ, цар цу оагӏонцара кхетам лакхбеш йола кхетаченаш мехка дӏакхихьалга.

Шахьарерча ӏама, Шолжа гонахьара моттигаш цӏенъеш къахьегама шоаттанна юкъе дакъа лоацаш хилар кагирхой. Белгалде деза, укх шин шера, хьалхара гӏо дарах бола болх берашта геттара безабеннилга. Ардара бетта МЧС колледже цу оагӏонцара яхьаш дӏайихьар. Цӏаьхха цхьа моллагӏа хатар ийккхача хьалхара гӏо дар мишта хила деза шаьрдир къонабараша. Хӏара дийнахьа къахьегаш да бераш доал доацаш ара лелача хьайбашта гӏо дара тӏехьа. Шахьарерча дешархоша болабаьча боламга гӏолла, цу мискача хьайбашта цӏалгаш оттаде, кхача эца аьттув хилар. Шахьаре эггара хьалхарча оагӏонца тоае еза моттигаш белгалъеча хоржамашка а доккха дакъа лаьцар гӏо деш лелараша.

Беркате хургда аьнна мел хеташ дола хӏама хьаллоацаш хьабоагӏа Хьалхарбараш. Тахан цар хьинаре къахьегар, дуккхача моттигашка шоай сийрда лар йита гӏертар шахьара хьакимаша лакха лоархӏаш да. Моллагӏдола кхоачамбоацараш меттадоаладеш дӏахьоча балха юкъе дакъа лаца кийча болаш, хьабоагӏа Даьла духьа дикаш доаржадераш. Шахьара кулгал деш волча ӏумаранаькъан Аслана белгалдечох, хьатӏадоагӏача 2026-ча шера Хьалхарбарий проекташ хьаллоацаш, пайдане, беркате хургда аьнна мел хетар доаржадеча наькъ тӏа царна гӏо деш хургба шахьарера хьакимаш.