ЛаьрхIа оттадаь декхараш кхоачашдеш, дикка къахьега дезаш хул сиха оарцагIъухараш. Наьсаре дIахьош хиннача цу тайпарча аргIанарча кхетаче укх наькъа дакъа лоацаш хилар журналисташ, блогераш, университетера студенташ.

Яхьаш хиларал совгIа, массанена пайдане йолаш кхетаче яр из.

Цу тайпара хIама леладе дезаш хиннабацар гулбеннараш хьалхагIа. 12 сага дакъа лоацаш дола из гIулакх лакхача боараме дIадахар ала йиш я тахан. ЦIи йоаеча оарцагIъухарий болх ма барра байзар царна цу дийнахьа. Шоай болх дика ховш болча говзанчаша дагадоацача хатара юкъе нийсвенначунна гIо ду, вIалла ца меттача тайпара саг кIалхарваккха аьттув боал цар, Даьла къахетамца.

Тахан вайна юкъе дукха бераш, кагирхой ба шоай вахар МЧС оагIонца дувза хьагаш. Ма дарра аьлча, низ, хьинар долаш, наха гIо деш хила лов дуккхача кхувш латтарашта.

Цхьан дийнахьа иштта бола турпалаш хинна, шоай низ бовза аьттув хилар ГТРК «ГIалгIайче» корреспонденташ болча Дударанаькъан Ислама, Бохтаранаькъан Исраила, «Сердало» газета видеограф йолча Цисканаькъан Надияй, укх йоазон  автора Гаьгенаькъан Мартинай.

 Ший дегIацара керда начIал гойта дезаш дар этта хьал, хIаьта из доакъашхоша геттара дог айденна болаш дIадихьар. «МЧС яхьашка дакъа лацаро дукха хIама довзийт. Хатар хиннача оарцагIъухача наьха болх мел чоалхане, фийла хила везаш, бехктокхаме ба зийра аз тахан. Доккха дукъ да цу наха тIалаттар,  вай массане хам бе безаш»,- аьлар Дударанаькъан Ислама.

ВIаший бувзам болаш, хIаране декхараш къоастадаь долаш чакхдаккха дезаш гIулакх да из, иштта ца хилча, ма хетта дIадохьлургдоацаш. «Аз айса укх юкъе дакъа лацац, бакъда тоабан доакъашхоша деррига аз хьалхадоаккхаш дIахьу. Кагирхой вIалла кхера безац, деш дар дикка уйла яь, сиха, кадай деш хила деза», - аьлар хьалхарча тоабан тренер волча ТIонганаькъан ИбрахIима.

Илдарха-ГIалий тIарча № 4 йолча МЧС оагIонца болх дIахьош бар блогераш Буражанаькъан Адам, ГIулой Жанетта, Эккажанаькъан Марем, Коазой Лолита.

Духьалара халонаш юстартотташ, дIабаха безаш бар уж берригаш. «Ишттача кхетаче дакъа лацар боккха пайда боаржабеш да. ЦIи яьннача оарцагIъухача наха хIара дийнахьа беш бола болх бе этта оаха кхетадир, цу къахьегамхой хам баь варгвоацилга, царна хьалхашка латтар дувцилга а доацаш доккха гIулакх долга. Боккха низ эшарга хьежжа, низ болча, кадайча маIача наьха болх ба из. Из професси эггара лоархIамегIа ярех я тахан. Къаьстта кхувш латтача тIехьен эшаш я уж яхьаш. Республикерча МЧС гойтар дика, пайда беш масал да»,- белгалдир туризме къахьегаш йолча ГIулой Жанеттас.

ХIара тоабан тIалатташ декхар дар шоаш арабоалача хана дерригача  гIирсашцара, барзкъашцара болх  нийсагIа хеттача тайпара дIабахьар. Ма дарра аьлча, низ тIалоаттабеш хIама дацар тхона. Барзкъаш нийсса тIадувха дезаш дар тхо( хачи, тIехкар, куртка, аьшка кий). Цул тIехьагIа, хьунагIа цIи яьнна эттача хатара юкъе ког кагбаьча сага гIо деш хилар. Бокъонца лозаваьча сага деш дола новкъостал деш, цунга садахийта хьожаш кхестар.

Буражанаькъан Адама зIамагIа вола воша цхьан хана МЧС болхло хинна ва, цунга хьежжа, цхьацца говзал яр цун . «Цхьаццане дувцаш хайнар цаI да, хIаьта ший кулгашца , хьаькъалца из деррига кхоачашде оттар аттача декхарех дац. Дукха керда хIамаш дайзар сона, сай дегIацара низ мел ба хайра. Аз-м укх тайпара болх боаржабайтаргбар, 9-11-ча классашка дешаш болча кагирхошта юкъе.

ЦIи йоаерий балхацара кхоачам арабаккхар, кийчбар, корзагIдаьнна хьувза арара жIалеш совцадар, лозабаьраш дIабахьа сихха кулга кIалха нийсъеннача дахчах цхьа хIама хьаяр, гIишлон чухьнахьара, арара цIи йоаяр, дIа-хьа яржалехь – из деррига цу балхацарча декхарашта юкъе да.

Мехкарча дешара моттигашка вай иштта йола яхьаш дIакхахьар геттара дика хургда аьнна хет сона» ,- аьлар Наьсарерча мэра гIонч волаш болх беча Буражанаькъан Адама.

Эггара кадайгIа гойтар шоаш  ГIалгIай паччахьалкхен университета студенташа: Гаракхой Амира, Тоачанаькъан Мухьмада, Харсенаькъан Хизара, Мамилганаькъан Мухьмад-Амина. «МаIача наьха батальона»  хьалхаэттар Эккажкъонгий-Юртарча № 6 йолча МЧС оагIон болхло Къоастой Сулейман.

Йиллача хана шоашта хьалхашкара декхараш кхоачашдеш чакхбаьннача царна йоагIаш  кхаьчар котало. Студентий спортклуба кулгалдеча Цхьорой Салмана белгалдечох, спорте низ, сабар эш… Хало йоацаш цхьаккха а вIаштIехьдалац яхар, нийса аьнна да. Спортсмена никъ хала, кхераме хеталуш бале а, хьаькъалца, сабарца хиларо дуккхача хIаманга кхоачаву.

Вайна ма харра, оагIой бетта 27-ча дийнахьа Россе МЧС ший 35 шу дизар дездергда. Цу ден хетаяь дукха тайп-тайпара кхетаченаш я мехка дIахьош, тха турнир а я цу юкъе.

 Из болх чакхбоаккхаш дукха дика, деналах бизза бола нах байзар тхона. Аз кхетадир, къаьстта цу наькъ тIа къахьегаш бола нах вай эггара чIоагIагIа лархIа безилга. Хала хиларал совгIа, кхераме дола декхараш кхоачашдеш, деналах ца бохаш, халонех юха ца боалаш шоай болх дIахьош латт уж, массанена накъабоалаш. Иразе, беркате хилба цар вахара никъ!