«Даьймехка турпалхой Ди - из цӏай да; Даьхе бахьан долаш шоай са ӏодилла кийча болаш; денал, майрал гойташ латтарий сийна дӏахьош дола. Цу дийнахьа дагабох дӏаяхача ханашка, тахан латтача хана шоай цӏераш цӏаккха наьха дегашкара яргйоацаш йита вай майра бӏухой, тӏема ветеранаш. Царна карагӏдаьннар яздаьд исторен оагӏон тӏа. Гӏалгӏайчен кадеташта, Лоаман кадетий корпуса хьехамчашта из ший белгала да. Цо безам хулийт кердача лакхаленашка кхача, Даьхенцара безам совбоаккх, Даьхен хургдолчун хьалхашка шоаш бехктокхаме хилар хьагойт».

Зурабанаькъан Ахьмада белгалдир, Гӏалгӏайчен ГКК курсанташ Даьхе лораяра дикача ӏадатий тӏехье хилар, цар хӏара дийнахьа дӏахьоча къахьегамо, цхьоагӏо йолаш хиларо, дешарах кхеташ хиларо, Даьхенна гӏулакх дара кийча хиларо из хьагойт, цунца гуш да турпалал, Даьхе езаш хилар.

Къаьстта баркал ала дезарех ба кадетий хьехархой, иштта хьехамчаш, цар бу царех боккъонца бола къонахий, шоай Даьхенна мутӏахьа бола бахархой.

«Укх дезача дийнахьа аз дег чура баркал оал шоана, могаш а ираз долаш а хилда шо, шоай балха тӏа, дешарца аьттув хилба шун даим, -йоах баркал оалача каьхата тӏа.- Дӏаяхача а таханарча а ханашкара вай турпалхоех даим шоана масал хилда, оаш хержа никъ Гӏалгӏайче а, иштта вай сийдола мохк Росси а дикача гӏулакхашка бугаш ба».

Лоаман кадетий корпусе цӏай дӏахьош, сцена тӏа гулбелар начӏал дола вай зӏамига бахархой. Сцена тӏа араяьлар «Мужече» яха Мужечара культуран Цӏен берий халхара ансамбль. Цун керте латт Гӏалгӏайчен культуран цӏихеза болхло Итазанаькъан Осман, цу тоабо гойтар юха а ший лакха говзал хилар. Цар даь «Катюша» яха халхар дег чу дужаш дар дукхача наха. Боккхача безамца, дег чура, лакха говзал йолаш дӏайихьар цар из программа.

Хьажа баьхкараш, ца совцаш, тӏоараш детташ бар, дукха ха яьккхар цу тайпара из халхар шоашта дезаденна хилар гойташ. Цунца чакхбоалаш бацар ансамбла болх. Къонача халхарчаша юха а самукъадаьккхар гулбеннарий. Цар хоза черсий халхар гойтар. Цига шоайла вӏашагӏкхеташ дар ӏадаташ, таханарча заман хореографе оагӏув.

Кхетаче дика дакъа лаьцар Эбарга-Юртарча культуран Цӏен йиӏигий тоабо. Хьаьшанаькъан Имана, Дали цига ӏомалуш бола дикка ха я, царна керте латт исбахьален кулгалхо Пхьиленаькъан Фатима. Йижараша «Даьхен лорабой» яха илли аьлар. Цар цӏенача, дег чу южаш йолча оазо зале сатем оттабир. Хӏара дош хьахозаш дар баркал оалача тайпара, вай бӏухой хестабеш, кӏаьдача оазо гулбеннарий дог хьестар.

Гулбеннарашта хьалхашка араяьлар Сурхо тӏарча №5 йолча ишкола «Цхьоагӏо» яха вокальни тоаба, цар дӏааьлар «Гӏалгӏайче» яха илли. Исбахьален кулгалхочо Даканаькъан Лейлас кулгал деш, къонача иллиалархоша гойтар шоай екаш йола хоза оаз, цар кийчъяь хинна программа къаман ӏадаташ дегӏадоагӏаш хилар гойташ яр, наьха дегашка безам, шоай къамах доаккхал деш хилар дитар цар.

Лакхача боарам тӏа бар цу дийнахьа Лоаман кадетий корпуса дешархой. КӀаьнкаша, тӏема гӏирс бийха, литературни композици гойтар. Из хетаяь яр Даьхен Турпалхошта - вай мехкахошта. Цар программаца видеоролик яр – цӏихезача гӏалгӏай къамах болча Российски Федераце Турпалхой сурташ дар йоккхача экрана тӏа гуш.

Чӏоагӏа тӏоараш детташ, тӏаийцар «Са паччахьалкхен байракх», «Россена гӏулакх дар» яха иллеш, уж дӏаала араяьлар «Лоаман кадетий» тоаба. Шоай хьехамчас, Гӏалгӏайчен цӏихезача хьехархочо Гарбакханаькъан Любас кулгал а деш, ерригроссийски мехкашта юкъерча, иштта республикан иллиалархой яхьашка уж цкъа котало яьккха ӏийнабац, уж дика бовзаш ба наха юкъе.

Цӏай чакхдоалаш, юххера а, «Вошал» яха илли дӏааьлар. Цига лаьрххӏа вийхавар «Престиж» яхача тоаба солист Зортанаькъан Гирихан.

«Дицлургдоацача концерто ший лар йитар цига хиннарий дегашка, - аьлар «Сердало» газетага Абдурзакова Аьсета.- Цу кхетачене керттера дакъа хетадаь дар Даьхе лораеш латтача бӏухошта, цар денала, майрала. Концерта программа хӏара номер Даьхен сийна вӏашагӏъеллаяр, цунца гойтар дӏаяхача а таханарча а ханашка денал, майрал гойтача турпалхой сий деш хилар. Кхолламга гӏолла довз берашта шоай мехка истори, иштта царех хул, хьатӏайоагӏача хана Даьхен гӏулакх дара дикагӏа дола ӏадаташ дӏахохьоргдола тӏехье.