Диъ шу да вайца Даламбика Ювсап воаца, бакъда цо кхелла никъ дӀахо а бахаш ба мехка, эггара вогӀ дола иммунодефицит оала лазар сага хургдоацаш къовсам лоаттабеча керттера моттиг дӀалоацаш.

Байсхаранаькъан Даламбика Ювсап ваь хиннав 1966 шера лоаман лакхача моттиге уллача юрта Хьуле. Из хьалкхийнав боккхача дезала юкъе, шоайла тӀаоттар, гадаккхар, новкъостал дар керттера Ӏадат лоархӀаш йолча фусаме. Уж керттера хилар цун оамал кхоллаш, сага лоархӀамера белгалонаш шийна чулоацаш. Саг а профессионал а хиларга диллача, из белгалвоалаш вар хьалхаоттарца, ший новкъосташта, гаргарча наха хьалхашка бехктокхаме хиларца. Цунна дика ховра нах вӀаший гаргабоалабе, толам боаккхаргбола оагӀонаш лаха.

ЗӀамига волча хана денз, гучаяьлар цун хьалхале лелаяра оамалаш, иштта дика дакъа лоацаш хилар массайолча вахара оагӀонашка.

1982 шера из хилар ВЛКСМ доакъашхо. Ший лоӀам хиларах эскаре а вахар. Цига герзашцарча низашка цо яьккхача хана, совгӀата делар наькх тӀа доахкаду седкъий: «Гварди», «СА дикагӀвар», «ДикагӀа вола парашютист». Цига цо караерзайир тӀема говзал - фегарча десанта бӀун бронетранспортёрий ротан старшина.

Лора балхаца ший вахар дувзаде Байсхаранаькъан Ювсапа лаьрхӀар 1987 шера. Из деша эттар Къилбаседа-Хӏирийчен паччахьалкхен лорий институте. Бакъда, ше хержа вуз чакхъяккха езаш хул из Махачкале. 1992 шера хиннача хатарах, кхыбола гӀалгӀай студенташ санна, из дӀа ца вахача валацар Селий мехкарча лорий институте. Цкъа хьалхагӀа «Педиатре» говзал ӏомайийя, из тӀехьагӀа кийчо еш хилар «Хирурге» даькъ тӀа.

1996 шера, ГӏалгӀайче хьакхеллар «АнтиСПИДа республикански центр», тӀехьагӀа цӀи тиллар цох СПИДаца, иштта кхыча инфекцей лазарашца къовсам лоаттабара профилактикан центр, аьнна. Кердача лорий гӏулакха керте оттар тӀадиллар Байсхаранаькъан Ювсапа. Из декхар цо тӀехдика кхоачаш а дир. Цига дӀадахийтар ший мел дола хьинар, лора начӀал. Цун дагахьа лаьттар дар, шийна дезаш долча гӀалгӀай къаманна ма хулла из лазар гаьнадаккхар. Лоаццача хана «АнтиСПИД» ГӏалгӀайче цӀихеза хилар, мехка из унзара лазар даржаргдоацаш, цу тӀа дукха болх беш хиларах.

Кӏеззига сабар дича Даламбика Ювсапа езаелар психологи. Иштта хьинар долча цун тара а дар, ше цу оагӀорахьа хьагойта гӀерташ хилар, цудухьа из деша отт Москверча психоанализа институте «Психоаналитически психотерапи» яхача даькъ тӀа. Цо 2005 шера диссертаци язъю, психологически Ӏилмай кандидат хул цох.

Цхьа шу хьалха Даламбика Ювсапа беннабар наькх тӀа боаллабу седкъа - «УнахцӀенон отличник».

Байсхаранаькъан Ювсап вайцара къаьстар 2021 шера. Из кӏалвисар цу хана корзагӏдаьнна хиннача коронавирус оалача лазарах.

Цун валар чӀоагӀа хала хилар гаргарча наха санна, ГӏалгӀайчен лор мел волчоа, дукхача цун унахошта. Из белгалвоалаш вар наьха бала, лазар, царна эшар довзаш хиларца, из санна вола саг дуне мел латт ваьхача а цецвоалилга дацар, из иштта наха эшаш хиларах, оарцагӀвоагӀаш вар из царна, дукха дезар ший мохк, ший къам.