«Укх массехк шера из цӀай дӀадахьар хьаллоацаш хьадоагӀарех да ГӏалгӀайчен халкъа кхоллама, культуран-дукхача адама хетаяьча кхетачен Республикан цӏа. Цу тайпарча хӀара концертах бокъонца дола цӀай хул, хӀана аьлча из диза хул ашарех, иллеех, байтех, кхолламах, иштта дег чура болча сакъердамах»,- аьлар «Сердало» газетага РДНТ кулгалхочо Зурабанаькъан Ахьмада.

Цига керттера дакъа лоацаш хилар дувцача цӏен исбахьален кулгалхо Абдурзакова Аьсет. Цун хьинар, профессиональни говзал хилар бахьан долаш, укх наькъа а концерта программа дика, безаме, йӀайха хилар, цига дакъа лоацаш мел хиннарашта дег чу южаш.

Могашал эшаеннача берий цахаддаш долча дешара Центра актови зал хьалйизар сердалца, мукъамца, гӀадбахарца, беламца. Дикача гӀулакхашта чудоагӀаш дӀахьош хиннача концертах хилар боккъонца дола дегай шоайла дагадалар санна, цхьайолча хана дӀаала хала дола дешаш, мукъамца хьахозаш хила таро яр. Укхаза сцена тӀа далар боккха мах болаш дар могашал эшаеннача берашта, тайп-тайпара концерта номераш безамах, йӀовхалах йиза яр.

Цига дакъа лоацаш хилар ГӏалгӀайчен халкъа артист Оздой Адам. Цун сцена тӀа валаро ший тайпара хьинар лора цига гулбеннарашта. НачӀал долча артиста ший тайпара хозйир из программа, Оздой Адама илли алара говзал ший теркам тӀаозаш я, цудухьа зал, цӀаьхха дийнъелча санна михьаръяьлар, тӀоараш детташ. Цо хӀаране юхь тӀа велар даьккхар, берий дегаш гӀаддигар, гулбеннарий самукъадаьккхар. Цох боккъонца дола цӀай дир йоккха говзал йолча артиста.

Адам массайолча хана белгалвоалаш хиннав ший тайпара долча иллешца, ма варра артист ше хилар гойташ, илли дӀаала ховш, наьха дегаш айдеш хьавоагӀа из.

Концерта йӀовхал, поэзе оагӀув тӀатохаш дакъа лаьцар къонача иллиалархоша-йижараша Хьаьшанаькъан Иманаси Далеи. Цар оаз яр ший тайпара екаш; йиткъа, хоза дӀайодаш; дегашка южаш.

Иштта хоза дакъа лаьцар Йовлой Софияс. Цунна хайра шийга ладувгӏарий теркам тӀаоза, цо гойтар къонача оаза хозал, ший начӀал.

Цига дакъа лаьцар «Сийг» яхача берий халхара ансамбло, гулбеннараша дика тӏаийцар цо деш дола халхар. Къонача артисташа гойтар чӀоагӀа безам тӀабодаш, кӀаьда, гӀалгӀай къаман халхара кеп йолаш дар, цу юкъе хоалуш дар таханарча халхарца гойташ йола, вай къаман культуран тӀехьален белгалонаш хилар.

Хӏара халхар, тӀоараш детташ, дӀайхача дешашца баркал оалаш, чакхдоалар; гулбеннарашта цох боккха салоӀам хулар, сапаргӀатадоаккхар.

Дика концерта программа дӀаяхьарал совгӀа, из кийчъяьраш хьежар, цига дешаш долча берашта кхыйола кхетаченаш а вӀашагӀйохка. Цо таро елар берашта дукхача ловзарашка, хьаькъале долча гӀулакхашка дакъа лаца, царех цу юкъе бӀарчча бокъонаш йола дай хилар.

Уж моттигаш цу юкъе нийсъяларах, нахацара къамаьл а дӀадахьа таро хилар берий. Центре дешаш долча бераша шоашта хетар оалар, иштта шоай хаттараш лора гулбеннарашка, юха озабенна боацаш, паргӀата юкъебаьлар уж цу гӀулакха. Царна хоалуш дар цу программан доакъашхой шоаш хилар, паргӀатта дӀадоча къамаьла юкъе шоай начӀала, кхетама боарам гойта йиш хилар цар.

Ловзараш, викторинаш дӀахьоча хана; берий яьнна ха, иштта кхыйола белгалонаш дӏалоархӏар, уж цар дӏаэцаргдолаш кийчдаь ловзараш дар, лаьрххӀа кийчо е езаш а дацар, цар хьакхоллар дика безаме хьал.

Хӏара бер ший тайпара белгалдоалаш дар, цхьадар сиха, шоллагӏдар сабаре, хьаькъал дӀакхоачаш, сакхетам болаш, иштта уж хулар цига белаш, шоайла бегаш беш. Цхьабараш геттара шоашта ховш долчох доаккхал деш, сихагӀа из шийна ховш хилар кхайкаде гӀерташ, чӀоагӀагӀа оалаш вар.

РДНТ Центра кулгалхочо Зурабанаькъан Ахьмада, чай молаш кийчо йир, мерза даараш оттадаь, цӀайна дозал белгалдора цо; сийрда, йӀайха фусам цига хьакхоллаш.

Из чӀоагӀа лоархӀаме дар берашта, шоашта иштта терко еш хилар цар гӀаддахарца тӀаийцар.

Зурабанаькъан Ахьмада дагадехар, Халкъашта юкъерча заӀапхой ди лоархӀаме хилар белгалдеш дар, гонахьарча дунен дикал чӀоагӀъяр, хӀаравар, моллагӀча хьале вале а, теркалве везаш хилар.

Дабе-Юрта дӀайихьача кхетачено хьагойтар, вай цхьана машар хьакхолла йиш йолаш хилар, цига хӀара сага хоалургдолаш ше везаш хилар. Из чӀоагӀа лоархӀаме да культуран юкъарло хьакхоллача даькъ тӀа.

Могашал эшаеннача берий цахаддаш долча дешара Центра кулгалхочо Цӏечой Ахьмада белгалдир:«Тахан хиннар - из духхьал концерт хинна Ӏацар. Иштта хьакхолл, вай мара «наьхабараш» боаца, массане дакъа доалла юкъарло»,-аьлар цо. Цо баркал аьлар РДНТ кулгалхошта шоаш хьаллацарах, иштта берригача доакъашхошта цар начӀалах. «Къаьстта иштта, гӀан тӀехьа гӀа боаккхаш, вай воайла хиларо хьакхолл дуне, цига хӀаране ший моттиг я», - аьлар цо.