Цу гIулакхо хьагойт, дIахо дIайодача хана а, туризма хьал лакхарча лагIа тIа доаккхаш, къахьега дезилга. Таханарча дийнахьа Кавказера моттигаш ювце, эггара дукхагIа нах салаIа тIалатташ йола моттигаш Селий мохк, Балкхарой мохк, ГIалгIайче я. Цу даькъе болх беш йолча ГIулой Жанеттас яхачох, салаIа ухача наха хоза хет цхьацца тамашийна йола моттигаш. Къилбаседа Кавказе тайп-тайпара кхетаченаш хул, Россе моттигашкара нах салаIа тIахьехаш. Ший ханнахьа дIаболабеча цу балхаца дувзаденнараш дукха да. ХIара миIингера туроператораш къахьега дезаш ба, ма хулла дукхагIа нах шоай доалахьарча моттигашка тIалаттаргболаш. ХIара шера цхьацца кердадараш юкъекхувл, болх дикагIа дIагIоргболаш. Массе моттигашка гобоахаш, салоIаш лела Iемача наха, хувцалуш дола сурт деза. СалоIам массахана цхьан тайпара латтаргбоацаш къахьег ГIулой Жанеттас Россерча болхлошца. ЙIовхал хьаэттача, укх бетта 23-ча денгара 30-ча денга кхаччалца, салоIам Iалашбеча наха кIира хургйола тураш дIайолаю. Ма дарра аьлча, диззача кIира гIалгIай мехка Iеш хургба туристаш, республикерча хозача моттигашка гIолла гобоахаш, цул тIехьагIа балкхарой, нохчий мехкара хоза моттигаш гойтаргья царна.

«Керда тур йолаш салаIа баьхкача хьаьшашта аз гойтаргья Къилбаседа Кавказера хозал. Царна гургба Россе эггара лакхагIбола лоам Эльбрус, ерригача Европе эггара кIоаргагIйола, Махачкалера 80 км дIахо дIавахача Сулак яха хий диткъделе, голаш етташ, лоамашта юкъе лела моттиг», — дийцар тхога туристий гIулакхага хьожаш йолча ГIулой Жанеттас.