Митинге, цу дега чов еш долча денах лаьца къамаьл дир Къаман Собране кулгалхочо ТIумхой Мухьмада, къаман правительства хьалха латтача Йовлой Мухьмада, иштта, кхыбараша а. Дийцар, цу унзарча дено вай къаманга такхийтача халонех. Шоай хьаьнала къахьегаш, маьрша баха Iема нах, низах шоай фусамашкара арабоахаш товарни вагонашка чубехкаш шийлача, хийрача мехка бодача бIаьхача новкъа Iобахарах.

Мелла йоккха халонаш, Iазап, харцо ла езарах, шоай Iадаташ, хоза оамалаш, сина низ, дег чура дин ца доадеш гIалгIай къам чакхдалар белгалдир боккхача наха. Деррига гуш волча Даьлагара дуIашца оарц дехаш, халонех ца кхераш, ца хаддаш къахьегаш дIахайтар вай сийдолча даьша, дикагIа долча вахара дай хила йиш йолаш шоаш болга.

Ший къамаьла юкъе Мехкдас Келматанаькъан Махьмуд-Iаьлас аьлар: «Къам мехках даккхар — вай массане вахаре эггара халагIа дола, дицлургдоаца ди да! Вай къаман вахаре дуккха а хиннад, ла ма могга дола хала денош, бакъда, гIалгIаша низахи деналахи ца бохаш текхад духьала мел даьннар. Низ халар вайнаьха, шоаш бохаргбоацалга, харцонашта духьала латташ чакхбаргболга дIахайта. Цар доадинзар шоай дегIах даьхка хоза гIулакхаш, массе хана санна лорадеш дIадихьар къаман беркате Iадаташ. Харцонца вIашагIделлачо цар сина низ боабанзар! Тахан вай массане декхар да, иштта низахи деналахи ца дохаш дIадахар. Вай ураоттабе беза керда мохк, Iилма доаржадеш, къаман пайдане хургдолча хIаман тIехьа къахьегаш, нийсача хьехамца лакха начIал дола тIехье кхееш.

Дикача хIаман тIехьа воайла барт болаш, вIаши гIо деш, сийрда наькъаш хьаделаш дIадаха деза вай».

Митинге гулбеннараша хьоахадир шоай гаргарча наха Сибарех диа денош. Дийцар, са санна безаш хиннача мехкара цхьаккха бахьан доацаш арабахаро, цар мискача дегашта мелла боккха IотIкъам баьб. Шоаш вIашагIа мел дийттар дуташ, еррига бокъонаш йийхка, хийрача мехка кхаьчача гIалгIай къамо йоайинзар ший юхь!

Из деррига хьахьокхаш болча Мемориала залашкарча гойтамга хьийжар нах. ДуIаш деш Даьлагара бийхар, шоай мехках кхета ираз ца хулаш Сибарех вахар хаьдараш. Республике коронавирусни инфекци яьржа латтар керте а лоацаш, санитарни хьал ма хулла лорадеш, дIайихьар митинг.