Иштта цига баьхка хилар тайп-тайпарча болх-моттигашкара нах. Царна юкъе бар юртарча, Наьсарерча ишколашкара хьехархой, гуржий къаман ассамблейна хьалха латта Гавардашвили Манана, татрий НКО «Акбарс» яхача татрий НКО кулгал ду Салимжанова Светлана, Украински «Червона рутонна» кулгал ду Заводская Любовь, эрмалой «Аястан» НКО кулгал ду Епремян Джемма, Киргизий къаман ассамблейна кулгал ду Мадрахимова Мохидил, иштта кхыбараш. Эккажкъонгий-Юртарча культуран цӀен кулгалхо БӀарахой Мадина яр форум хьайийллар. «Тахан вай дувцаргдар массанега кхоачаш дола доккха гӀулакх да. Деналца Даьхе лораеш латтача къонгий цӀагӀарча наха новкъостал де дезаш да вай дерригаш. Тайп-тайпара секцеш хургья вайцига: кхалнаьха унахцӀено, тӀема доакъашхой дезалшта гӀо дар, кхалнаьха хӀама хьаде аьттув хилар, юридически оагӀув, иштта кхыяраш. Массайолча моттигашка къахьегаш бола кхалнах цхьанкхетарга буга гӀа ба вай тахан боаккхар», — аьлар БӀарахой Мадинас. ГӀо эшаш болча наха эггара хьалха де дезарех дийцар кхетаче. Эггара чӀоагӀагӀа наха хетташ хиннараш дар дешарцара хьал, унахцӀенон гӀулакх, льготаш. Бахархой мел хиннача хаттарашта жоп луш, цу гӀулакхех бола болхлой бар. «Иштта йола кхетаче вай мехка хьалхара дӀахьош я. Сога хаьттача, каст-каста дӀакхахьа еза тӀема доакъашхошцара кхетаченаш. Даьшта, ноаношта, берашта ха деза, паччахьалкхено шоаш бицбергбоацилга, эшаш дола гӀо лоаттадергдолга. Къаьстта лакха тӀахьожам лоаттабе беза республикерча хьакимаша цу гӀулакха», — белгалдир Овшанаькъан Мухьмада. Дийшача наха Даьла цӀи йоаккхаш, хоза дӀайихьар из кхетаче. Вай республико лакха терко лоаттаю тӀема доакъашхошта, цар дезалашта. Республикан кулгалхочо юххьанца денз иштта чӀоагӀдаь дӀаоттадир из гӀулакх, ше тӀахьожам беш.