Вайна дика ховш да, шелал яхилга фуд. Бакъда вай яйза даргдац сигален къайленаш, цун седкъий мо мара. Малхбоален Азе ба математикан мохк - Инди. ГӀалгӀайчен паччахьалкхен университете дешаш ва цигара 200 совгӀа студент. Берригаш а цу мехкара ба уж. Шоай оамал йолаш, вахара хьисап долаш, Ӏалама хьалаш шоай тайпара тӀаэцаш нах ба уж.

«Ӏан салоӀам» яха фестиваль дӀахьош яр «Магас-Шахьара спорта, туризман, культуран Центре». Цига дакъа лоацаш хилар, дӀадаха шу чакхдоалаш, гаьнара вайцига баьхка студенташ, уж 27 вар. Царех цхьабарашта хьалхара гуш дар лоа, цунга хьежжа Ӏан замах дӀахьош долча спорта ловзарех а царна хӀама хацар. Царех цхьанне Чаубей Маниша йоахар, ше эггара хьалха лувжаш тӀа эттача хана ше кхерар цӀаккха а дицлургдац шийна.

«Цхьа ха яьлча, из хьал дикача оагӀорахьа хувцаделар, цул тӀехьагӀа, айса деш дар фуд а ховш, геттара чам чубелар са. МоллагӀа дола хӀама, хьалхара Ӏомадеш хилча, хала да, бакъда котваларо гӀадвуг тӀехьагӀа», - йоах Маниша. Уйла ел оаш, цхьаволча сага шелалах ша хулаш хиларах тамаш яц, хӀаьта кхыча дунен йистера венача сага из кхыметтел фуй а хац. Инди яха мохк бӀайха бале а, цун бахархой кхераш бац шелалах. Доакъашхошта декхар деннадар соалозаш, лувжаш хахка, лай мажаргех ловза, муш озабеча шоай низ гӀортабе. Цар, кхы дукха уйла ца еш, лаьрхӀар шоашта денна декхар кхоачашде а цу тӀехьа шоашта фу карагӀдоал хьажа а. Пхьарчанаькъан Мухьмада цӀерагӀа стадион хьалйизар дакъа лоацаш хиннараша а иштта хьажа баьхкараша а. Из салоӀаме фестиваль дӀахьош мел йолча хана, хьехархоша новкъостал а дир царна. Хьехамчаша, хӀаранеца дагабувлаш, хьалхадоаккхар де дезар, говзал йоаца кагирхой нийсача наькъ тӀа боахаш.

Цу къовсаме «Атхарва» яхача командо боарза совгӀат даьккхар, хӀаьта «Манисо» шоллагӀа моттиг яьккхар, керттера совгӀат «Анкуль» яхача командага кхаьчар. Царна кхаьннена а совгӀаташ делар ЦКСиТ кулгалхочо Къоастой ИбрахӀима. ИнгГУ студенташ гӀадбигар шоашта, баркал оалаш, совгӀаташ даларо, кхыдола каьхаташ а дар цу юкъе, уж деннараш бар фестиваль вӀашагӀъеллараш.

Магас шахьара спорта, туризман, культуран Центра болхлоша кхы а цу тайпара керда яхьаш дӀахьоргья, цу юкъе дакъа лоацаш хургба вайцига гаьнарча мехкара баьхка хьаьший а. Хьежаргда вай царга.

Керда вӀаший бовзараш долаш, дика гӀулакхаш дӀа-юха эцаш, дӀахьу Индера баьхкача студенташа ГӀалгӀайчен столицера Ӏан заман мукъа денош.