Керттера дар цига веза хьаьша, №5 йолча ишколе ди хьехаш вола Бохтаранаькъан Жабраил вена хилар. Дика кхетарг болча беса, хьехамчас дийцар кагирхошта цу лоархӀамеча езача ханах лаьца. Белгалдир марха кхоабаш хилара дозал. Иштта Бохтаранаькъан Жабраила берашта хьалхадаьккхар, Рамадан - из даарах юхакхетарал совгӀа, чура цӏенвалара йола ха я, аьнна. Цо иштта белгалдир лоархӀаме хилар уллуврча сага терко яр, мискача наха новкъостал дар. Къаьстта цу дезача деношка лоархӀаме а, ший тайпара маьл хулаш а да из.

Цу кхетаче дакъа лоацаш бар къона артисташ. Цар боккхача безамца йийшар байташ, шоайла лоархӀаш хила безарах дола мугӀараш, иштта белаглдир дезала, къаман Ӏадаташ лораде дезаш хилар. Хӏара дош ший тайпара чулоацам болаш дар, цхьаккха а висанзар царна юстара.

Геттара безам тӀабодаш дар къонача суртанчаша шоай болх гойтар. Цар шоай сурташ цига гойта оттадир, уж дар цар кулгалхочо Мураданаькъан Зурихана тӏахьожамца исбахьален говзала кружокашка бераша шоаш хьакхелла гӀирсаш. Шоай сурташка бераша гойтар шоашта хозал мишта гу, культура мишта лоархӀ. ХӀара дош, йӀовхал телаш санна, ший моттиге дужаш дар, дег чура доагӀаш хилар гойташ. Хоза дӀаоалача дӏаоалача иллеша самукъадоаккхар, берригаш а цу хозача хана чубугаш санна хеталора.

Кхетаче дӀахьош терко тӀаяхийтар кхетам балара оагӀонна, из дӀахьош яр Бохтаранаькъан Хьава, цун къона гӀонча, культуран ЦӏагӀа Ӏомалуш йола Лаьнанаькъан Рабия. Цу тайпара кхоллама оагӀув кийчъяь хиларо хьагойтар, тахан эггара чӀоагӀагӀа лоархӀаш дола Ӏадаташ лорадеш хилар.

Кхетаче дӀахьош хиннараша хьаьшашта дийцар Рамадан бетта лоархӀамах лаьца, из бутт боккхача къахетама, тешама бутт хиларах. Бохтаранаькъан Хьавас, Лаьнанаькъан Рабияс дика кхетаргболча оагӀорахьа дийцар марха кхабара дозала керттерча бахьанех, цар хьалхадаьккхар из дегӀа низ юхатохарал совгӀа, дег чура дегӀ цӀенлуш йола моттиг хилар.

Кхетаче дӀахьош хиннараш хьежар цу езача хана кӀоарга маӀан довзийта- Рамадано тӀахьех цӀенвалара, ди чӀоагӀбара, дег чура ламаз деш, дика гӀулакхаш деш хилара. Цар дийцачунга ладийгӏача, хоалуш дар хӀара цу бетта ди- из дикагӀа, къахетамегӀа, дина гаргавоагӀаш хилара йола ха хилар.

Кхетаче дӀайихьар кӀоаргга ӏилма довзара тӀакхувш долча къамаьлаца. МагӀалбика кхален культуран-салоӀама моттигашка Ӏомалуш долча берий таро хилар ди Ӏомабара даькъ тӀа шоашта ховр гойта. Къаьстта безам тӀабодаш дийшар КъорӀан тӀара деза Сураташ, дезача дешах зал хьалъюзаш.

Бераша дика жоп лора истореца, бокъонашца, Ӏадаташца дувзаденнача хаттарашта. Кхетаче дӀаяхьаро хьагойтар Ӏадаташ лорадаь ца Ӏеш, кӀоаргга Рамадана маӀан довзаш хилар.

Бераша, иштта чӀоагӀа безам болаш, хаттарашта жоп луш хиларах гуш дар, цар дегашка даьй тӀехьале яхар, керда дешара оагӀонаш йовза гӀертар кхы а дегӀадоагӀаш латтилга.

Юххера а, кхетачене къамаьл дир культуран Цӏен кулгалхочо Хоаной Марета. Гулбеннарашца къамаьл деш, цо баркал аьлар МагӀалбика кхален культуран-салоӀама центра кулгалхочунна Чергӏазанаькъан Ахьмада, иштта кхален массайолча культуран- салоӀама моттигий кулгалхошта, цу тайпара кхетаче дӀаяхьа новкъостал дарах.

Къаьстта баркал аьлар, из кхетаче вӀашагӀъеллача, «ГӏалгӀай Ӏадатий бовхьамаш» яхача кружока кулгалхочунна Лаьнанаькъан Заретхана. Хоаной Марета белгалдир цо доккха дакъа лаьца хилар дин мах бараш лорадара, кхувш йоагӀача тӀехьенна дика кхетам балара. Цо баркал аьлар хӀара хьаьшанна, доакъашхочоа, цу дийнахьа цига хиннача наха, уж баьхкабар цу безача мархий бетта дегагӏоз цхьана екъа.

Эггара дукхагӀа теркам тӀаозаш дар, цӀай чакхдоалаш къона доакъашхой безбар. Беза Рамадан бутт хилара сийна, МагӀалбика кхален культуран-салоӀама центро шийгара совгӀаташ делар. Берий деладаларо тешал дора цу тайпара кхетаченаш вайна эшаш хилара, цар таро лу дикагӀа йола оамалаш кхувш йоагӀача тӀехьенна йовзийта, царна нийса кхетам бала.

Дерригача дунен тӀа бахача бусалба наха лоархӀаме ба Рамадан бутт. Къаьстта цу дезача деношка Мухьмад Пайхамарага (Даьлера салам-моаршал хилда цун) дессад Деза КъорӀа хьаделлар, из Макканна юххерча Хира оалача хьагӀар чу ше цхьаь волча хана. Циггара хувцаделар истори, адамашта тешар, хьаькъал далара никъ сердалца гойташ. Карарча Рамадан бетта хӀара цӀагӀа беркат, ираз, дег чура паргӀато хийла! Массавар динах чӀоагӀлуш хилва, могаш, маьрша вахалва.