Республикан кулгалхоша тахан могаш мел дар ду СВО ветераний, цар цӀагӀарча наьха оагӀув хьаллаца, гӀо де. ЦӀабаьхкачул тӀехьагӀа лакхерча дешара моттиге деша овтта, Ӏаьдала балха арабала аьттув ба цар. Тахан тхона дувца лов тӀема пенсе вахачул тӀехьагӀа болх бе араваьннача Саккхаланаькъан Мусайх.

Вай мехкарча Паччахьалкхен университете, Краснодарерча РФ чухьарча гӀулакхех йолча министерствон университете дешаш, дукха шийна накъадаргдараш хьаийцад цо. Дукха ха йоацаш, Наьсарен кхален кулгал деча Исмейланаькъан Амирана хьавийха, лоархӀамеча балха тӀа араваьннав из. Кхален администрацерча мобилизационни кийчонах болча оагӀон кулгал деш, бехктокхаме ший декхараш кхоачашдеш хьавоагӀа Муса. Цо ше белгалдечох, шахьара гӀулакхаш дайза, деррига кхыча тайпара бӀаргадайнад цунна.

«Сай Даьхе геттара чӀоагӀа езачарех ва со, иштта волаш дӀачакхвала лов сона се мел вах», - дийцар цо. Къаьстта цунна дика хов, бӀухошта эггара чӀоагӀагӀа эшар фуд. ТӀема операце ветераний Ассоциацена хьалха латташ хиларо дукха хӀама довзийтад цунна. «Сайга кулгалде аьлча, вӀалла уйла ца еш раьза хилар со, тахан дехкеваьнна хӀама а дац. Даьхен гӀулакха латтача сага дика кхетаду, наха гӀо эшаш йола моттигаш дукха хулилга», - аьлар Мусас.

Вай мехка массахана хиннаб, тахан а ба турпалаш, къаман эздий, яхь йола къонгаш. Дуккха а хилба вай иштта къонахий, хӀаьта вай массахана цар оагӀув хьаллоацаш, могаш дола гӀо лоаттадеш хила деза.