Вахара керда оагӀув
Шолжера СВО доакъашхо белгалвоал ший къахьегамца
Вай замах каст-каста гу, мишта Ӏомалу нах кердача дӀадехарашта духьалъотта. Цу юкъе массайолча хана лоархӀамедар да, из саг дог цӀена долаш, дика оамал, денал долаш хилар. ХӀара дийнахьа эзараш маӀа нах бакъдолчун, нийсхон тӀехьа хиларах, латаш ба ЛаьрххӀа йола тӀема операци дӀахьоча. Уж массазарча вахаре юхабаьхкача, цар уйлаш геттара чӀоагӀа хувцалу. Дукхача бӀухоша яхачох, из цар дег чура доагӀаш да, зӀамига болча хана денз, царна беннача кхетамга хьежжа.
29 шу даьннача Бауленаькъан Темарлана даьгара хьаийцад цӀенна пайда беш хилар, хьаьнала рузкъа доаккхаш хилар, бокъон а нийсхон а тӀехьа хилар.
Массехк шу хьалха из зӀамсаг, ший воккхагӀа волча вешийца, тӀема гӀулакх Ӏомадеш хилар №37.18 йолча Наьсарен-Шахьара Росгварде даькъ тӀа. Бакъда цхьан юкъа вахар хувцаделар.
Тха турпалхочун вахара хьал дувца йиш йолаш да, массехк даькъа дийкъа: ЛаьрххӀача тӀема операце дакъа лоацаш хилар, чов яр, совгӀаташ далар, дукха меттаоттара ха йоаяр, цул тӀехьагӀа дӀахо хувцаденна вахар.
2022 шера, маьцхали бутт. Из тӀем тӀа вода. Массехк бетта цо дика толамаш доах. Цунна тешал деш да цун тӀабувхача эпсара тӀема гӀирса тӀа улла Дика толам баккхарах енна Суворова майдилг. Ардара бутт хьакхоачаш цунна чов ю аьтта кулга, цул тӀехьагӀа бетта дарбанче улл из, дӀахо ший гӀулакхера болх бутт цо.
«Мел деш дар диканца да, - йоах цо соца къамаьл деш. - Цхьайолча хана цхьацца долча хӀаманца нийсача наькъ тӀа нийслу вай».
Цхьа шу даьнначул тӀехьагӀа, цо саг йоалаю ше харжа йоӀ. Цул тӀехьагӀа, цун керда вахар хотталу, керда декхараш хьалхашка отт, шийна а наха а пайда боалаш къахьега волалу.
Кулг лозадаь вар аьнна доацаш, Темарлана дика вӀаштӀехьадоал натяжной оала тховнаш де. Из тешаш ва ший аьттув баргхиларах, хӀана аьлча цунна уллув ба кхоачара нах: фусам-нана, йиша, кхоъ воша - уж кийча ба мичча хана цунна новкъостала бахка. Цун болх эшаш ба ГӀалгӀайчен дукхача юрташка. Наха лакха мах оттабу цун балха, ший професси дика йовзаш хиларах, ше хьадеш дар дикал йолаш, цӀена деш хиларах.
«Сона чӀоагӀа лоархӀаме да сай хьамсарча шахьара Шолженна санна, ерригача вай республикан а накъавоалаш хилар. МоллагӀа хӀама деш хиларах вахара дакъ тӀа, дика гӀулакхаш дар, лерхӀам хилар, гӀулакхаца хилар доа ма делаш», - йоах тӀема операце ветерана.
Ховш ма хиллара, хӀама хьадеш хиларо воккхийву саг. Хетаргахьа, доккха ираз да шийна дезаш дола гӀулакх леладе таро хилар. Цул совгӀа, цох наха пайда а хулаш. Темарлана вахар цхьаькха дика масал да дикача исторен - къахьегама тӀера, Даьхе езаш болча, вахара чам бовзаш болча наьха. Цар гойт вахара дика оагӀув кхувш йоагӀача тӀехьенна, из Ӏомаеш къахьегама тӀера хила.
