Даьхенцара безам чӏоагӏбу болх хьаллацарах, белгалвир Магӏалбика мэр
«Росси эпсараш» яхача Ерригача Россе юкъарлон оагӏонцарча республикерча моттига хьалхалаттача Галай Руслана Магӏалбикерча администрацена кулгал деча Галай Мусайна «Россе эпсараш» яхача моттига президиума кулгалхочунгара, РФ турпалгара, инарал-майор волча Липови Сергейгара майдилг, баркал оалаш каьхат дӏаделар.
Шахьара мэра Даьхенцара безам, лерхӏам чӏоагӏбара тӏехьа къахьегарах хинна толам ба из. «Галай Руслана белгалдир, шахьара администрацега гӏолла кхувш латташ йола къона тӏехье нийсача наькъ тӏа яккхара тӏехьа дӏахьош бола болх дикка пайда беш болга. Къонабараш шоай Даьхе езаш, лоархӏаш хилара тӏехьа, мэре болхлоша лоархӏаме дакъа дӏалоацилга теркалдир цо», - йоах «Сердало» газетага шахьара администраце зарбан болх лелаберашкара кхаьчача хоамо.
Шийна денна совгӏат хьаэцаш, Галай Мусас доккха баркал аьлар, «Россе эпсараш» яхача оагӏонна хьалхалаттарашта. Иштта хьакима белгалдир, ураотташ латташ йолча къонача тӏехьен дегашка Даьхенцара безам, лерхӏам чӏоагӏбар керттерча гӏулакхех долга тахан. Цу оагӏонцара болх тӏатеӏӏа дӏахобахьа лерхӏилга хьоахадир цо.
