ГӀалгӀайчен миннаца къам мехкахдаккхарах лаьца йолча дикагӀча очерка яхь дӀахьу
ГӀалгӀай къам Юкъерча Азе, Казахстане Ӏодахьийта, мехкахдаьккха 80 шу дузаш, республикан дешархошта юкъе дикагӀа йолча очерка яхь дӀахьу, из хетаяь я гӀалгӀай къаман исторен балан денна.
«Яхь дӀахьоргья саькура бетта 20-ча денга кхаччалца, цига дакъа лаца йиш йолаш ба республикан 7-11-ча классашка багIа дешархой. Яхье балхаш хьаийдергда, министерствон электронни адресах minnats@ingushetia.ru. Яхьа хьалех ха йиш я тха лаьрххӀача сайтага гӀолла», - аьлар «Сердало» газетага ГӀалгӀайчен миннаце.
Адамашта лоалургдоацаш дола Ӏазап тӀадера 1944 шера саькура бетта 23-ча дийнахьа ГӀалгӀай, Нохчий къамашта. Йоккхача халонех чакхдаьлар гӀалгӀай къам, дукха адам къаьстар, бакъда шоай мехка юха цӀабахкарах йола уйла цӀаккха ца юташ, юха даьй баьхача мехка баьлар уж.
