Министра гIончас Кукурхой Адама кулгал деш, муниципальни даькъ тIарча викалаша дIайихьача кхетаче, кердача шера цIай долча деношка маьхаш миштад хьожаш хилар лоархIаме да, аьлар. «Сердало» газетага из хоам бир министерствон кепайоазон болхлошца бувзам лелабераша.

Минпромсвязо лаьрхIад, кердача шера луш дола кхачан тускараш таро йоацача дезалашта дала«,- йох хоамо.

«Шу чакхдоалаш, вайна дика ховш да, массаза а буача кхачан маьхаш айдеш хиннилга. Цудухьа таро йоацача наьха вIаштIехьадалац шоашта яа хIама эца, цу юкъе кхыметтел берашта луш дола мерзача хIамай совгIаташ доацаш а. Вай декхар да тахан, цу моча наха малагIа новкъостал де вай таро я хьажар», — аьлар Кукурхой Адама.

Иштта шоайла дагабоалаш, цар лаьрхIар тикашка кхачан тускараш гулде, таро йоацача наха дала аьнна. Цул совгIа йоккхача мах беш йолча тикашка маьхаш лакх ца дар а, тIахьожам беш хила деза, белгалдаьккхар гулбеннараша.

«Дикача гIулакхий тускар» латтаргда кассови аппараташта юххе. Вай республикан бахархой таро хургья цу гIулакха юкъе шоашкара дакъа лаца, моллагIа йилла а цу тускар чу хIама юллаш. Гулдаь даар таро йоацача наха дадекъаргда. Из дика гIулакх дIадахьа лерхI ГIалгIай Республикан хIара районе.

«Вай воашта могар де деза, наггахьа мара совгIат де йиш йоацача дезале из доккха доаца дика юкъедара», -- аьлар ГIалгIай Республикан Минпромсвяза мах бара отдела кулгалхочо Боголова Азас.