«ЛоархIаме да тIем тIа бахарашта дола хьалаш вIашагIдохкар, царна эшаш дар Iалашдаь хилийтар, эшаш хIама доацаш уж хургболаш. Цар дезала Iалашо яр республика декхарех керттера да, цудухьа царна лаьттана доакъош дIадекъар из дикка новкъостал хулаш да, хетаргахьа.

ТIем тIа бахараш кхетадеш хила беза, укхаза бисса шоай дезал хIама эшаш ца бахилга, уж Даьхе лорае бахаб, цар дезала а иштта, терко е йоагIа», — аьлар ше къамаьлдеш Келматанаькъан Махьмуд-Iаьлас.

Иштта лаьххIа йола льготаш чуйоагIаш дола хьалаш а хургда, мобилизацех бахарашта дезала лаьрхIа, уж ГIалгIай Паччахьалкхен Университете оттача хана. Цунах йола чIоагIо яьй лакхара дешара кхуврча кулгалхочунца. Уж льготаш йоагIаш я, 2024-ча шерага кхаччалца йолча хана тIахьийхарашта.

ГIалгIайчен доалахьарчунна Министерства тIадиллад, лаьттана доакъош дIадекъара бола болх, муниципальни даькъа тIарча викалашца цхьана дIаболабе, аьнна.