Сийлахь-боккхача тӀема юкъе лаьттараш бицбац вай кагирхоша
1941-1945-ча шерашка лаьттача тӀема юкъе дакъа лоацаш хиннача вай бӀухой цӀераш йицъяц кагирхоша. Мехкарча кагирхой кхетачений ЦӀен болхло волча ГӀалменаькъан Сайт-Мухьмада «Дийна каьхаташ» яха проект йолаяьй вайцига. Кхувш латтача тӀехьенна шоай даьша тӀема юкъе гойта майрал, денал довзаргдолаш, дӀахьош болх ба из.
«БӀухой хиннача цӀен нахага хьадувцийташ, тӀема истори довзийташ дола каьхаташ яздергда кагирхоша. Къонача режиссёраша, сценаристаша 20 гойтарафильм вӀашагӀдолларгда», - йоах тхога кхаьчача хоамо.
Къаман тӀема истори довзаргдолаш, интернета оагӀонашка гӀолла дӀа-хьа доаржадергда уж фильмаш.
«ДӀадахача бӀаьшерен эггара боккхагӀа болча тӀемо миллионаш наьха вахар дӀадихьад, царна юкъе хиннаб вай къаман майра къонгаш. ТӀема аренашка моастагӀа вохавеш, вай лаьтташ тӀара аравоаккхаш, цар текха хало йицъе бокъо яц цхьанне! Дуне мел латт даха дезаш истори да из! «Дийна каьхаташ» яхача проектага гӀолла, деналах бизза хиннача даьй истори довзарал совгӀа, шоай начӀал гойта а аьттув хургба къонабарий», - белгалдир Сайт-Мухьмада.
