Кавказа тохкамхой кхетаче, дакъа лоацаш ба вай мехкара къона ӏилманхой
«Россера Кавказ: истори, геополитика, культура» яхача ӏилман-дешара кхетаче дакъа лоацаш хилар вайцигара къона ӏилманхой. Кхетаче вӏашагӏъеллар «Машук» яхача дешара моттиго, СКФО РФ Президента массазарча викала аппарата хьаллоацаш. Из хоам «Сердалога» бир кхетачен болх вӏашагӏбелларех цаӏ волча Охценаькъан Ислама.
«ӏилман гӏулакха латтар декхар лоархӏаш вола Россе 120 къона ӏилманхо вар вӏашагӏкхийттараш. Вайцигара кхетаче дакъа лоацаш хилар Янданаькъан Аза, Тебой Илез, ӏалбаканаькъан Дауд, Овшанаькъан Хади, Дзахкенаькъан ӏайшет, Чиймарзанаькъан Луиза, Оздой Ильяс.
ӏилман балхашца дувзаденнараш шаьрдеш ба доакъашхой. Шоай проекташца болх дӏахьош хургба уж массехк дийнахьа», - дийцар тха газетага.
Кхетачен юкъе я цӏихезача федеральни говзанчий лекцеш, панельни дискуссеш, тоабанцара болх, Кавказаца ювзаенна тематически секцеш. «Ишттача кхетаче дакъа лацаро дукха хӏама ӏомадайт цӏихезача, боккхача ӏилманхошкара, иштта ший цӏи дӏайовзийта, ший балхах дувца, Кавказа моттигашца дувзаденнараш ӏилманхошца дашха аьттув лу», - дийцар вай мехкара цига вахача ӏалбаканаькъан Дауда.
