Йовлой Мусайх эллиной-румий латарах Россе диазза чемпион хилар
Наро-Фоминске йистеяьлар эллиной-румий латарах йола Россе чемпионат, мехка спортивни вахара даькъ тӀа лоархӀаме яр из. Цу чемпионате гулбелар Россе массайолча регионашкара дикагӀа бола спортсменаш, царех хӀаравар чемпиона цӀи яккхара тӀакхувш вар. Яхьашка керттера турпал хилар Токио-2020 яхача олимпийски ловзарий чемпионах Йовлой Мусайх, цун аьттув баьлар Россе диазза чемпион хила. Котало яьккхар цо.
Чемпионат дӀахьош, чӀоагӀа сатем этта, гулбеннараш хьожаш лаьттар из ха чакхъяллалца. Дозал 97 кг долаш, къаман чемпионате дакъа лоацаш вар Йовлой Муса, Москван викал волаш, латаш хинна Краснодарски краера вена Головин Александр - из яр эггара чӀоагӀагӀа хинна спортивни духьале.
Йовлой Мусайна карагӀдаьлар, дика кийчо яь, говзал гойтарца дошо майдилг яккха. Дог лазаш, цун коталонга сатийсараша даькъала вувц Йовлой Муса аргӀанарча коталонца. Уж тешаш ба; шийна дезар фуд ховш вола спортсмен дӀахо а кхыча лакхаленашка кхоачаргва, аьнна.
