2 млн совгӀа йола гранташ яьхар вай мехкахоша, «Машук» яхача кхетаче
«Машук-2024» яхача ерригача Россе кагирхой кхетаче шоай проекташ гойта, уж йоаржае 2 млн совгӀа гранташ яьхар вай хьинареча кагирхоша. Цу гӀулакха лакхара теркам бир вай мехкадас Келаматанаькъан Махьмуд-Ӏаьлас.
«Дог тийша ва со, уж проекташ вай къаманна беркате хиларах, вай культура, Ӏадаташ лакхача моттиге лоаттаде гӀо дергда цар. Даьхенах дог лазаш йола тӀехье ураоттаяра тӀехьа, вай кагирхошта керда, беркате наькъаш хьаделлаш пайда бергба цу лостамагӀа дӀахьоча балхо», - яздир вай Мехкадас ший телеграмм-оагӀон тӀа.
«Машук-2024» яхача грантех латтача яхьашка котало яьккхар Новразанаькъан Ахьмада (проект «Ловза, Ӏомале» - гӀалгӀай мотт Ӏомабе гӀо деш дола истола тӀара ловзар), Гезгинаькъан Аминас (проект - авиамоделированех бола болх дӀагойтар), Дзейтанаькъан Шамала («Кхоане бахьан» яха тӀема денала гӀулакхах йола проект).
