ГӀалгӀайчен керттерча хий хьалуча моттигашка, 20 кӀоарга насос оттаяьй
Республикан керттерча хиш хьалуча моттигашка, 20 кӀоарга насос оттаяьй, иштта дӀадихьад тоадара-меттаоттадара балхаш, цо таро хулийтаргья хий кхоачам болаш хилийта, яхаш, дийцар «Сердало» газетага ГӀалгӀай Республикан Кулгалхочун зарбан болх лелабераша.
Ахкан заман чухьа вайна каст-каста нийслу, хий хьа ца доагӀаш йола моттигаш. Из эггара вахаре лоархӀамегӀа дола хаттар да, цудухьа оаха тхоашта могар ду, бахархошта хий кхоачам болаш дӀакхачийта гӀерташ.
Аз тӀадиллад министрий кабинета, доал деча моттигашкарча кулгалхошта хин боахаме цхьоагӀо хилийтара дола декхар, хица Ӏалашо еча, из дӀа-юха хьожадеча боахаме лостам бар, цахаддаш коммунальни боахамашка эшарий Ӏалашо яр», - аьлар Келаматанаькъан Махьмуд-Ӏаьлас, цу хьакъехьа дувцаш.
Цо белгалдир, из хицара хаттар чӀоагӀа лоархӀаме хилар. Инаркъе, СоагӀапча, Долакоа, иштта МагӀалбик-Шахьара 2-ча доазон тӀа из доацаш хул. Укх тӀехьарча хана, цу даькъ тӀа дукха болх баьб.
300 метр хин турбаш хийцай ТӀой-Юрта, Долакха-Юрта. ГӀайрбика-Юрта хьалъяьй насосаш латта зӀамига станци, цо таро хулийт цу юрта хий лоаттаде. МагӀалбика кхале 1400 метр йӀаьха хин турбаш хийцай. Нах бахача моттигашка, хий дӀа ца кхоачаш бисача наха, хий дӀатӀакхухьаргдолаш 14 машин эца ахча дӀахьожадаьд.
ЛоархӀаме да хий лорадар. ХӀанз ахкан йӀайха ха этта хиларах, из чӀоагӀа лораде дезаш да.
