«Юртарча культуран цӀагӀа дийцар таханарча дийнахьа эггара чоалханегӀчарех долаш латтарех. Царех дар дӀаяржаш латта наркомани, наькъашкара бокъонаш цалархӀар, кхыдола тайп-тайпара зуламаш. Иштта дӀакхухьача кхетачеша бувзам чӀоагӀбу бахархоштеи МВД болхлоштеи юкъе».

Кхоачамбоацараш цхьан кога тӀа даха а аттагӀа хул. ЧӀоагӀа лоархӀаме къамаьл дар цига наркотикашта духьала къовсам лоаттабеча МВД оагӀонна кулгал деча, полице полковник волча Геграев Марата даьр. МВД УОООП кулгал деча, полице полковник волча Къоастой Ӏамархана дийцар, бокъо йоацаш леладеш дола герз Ӏаьдалга дӀачудала деза, аьнна.

Наьсарен кхален ОМВД кулгал деча, полице полковник волча Хамхой Ӏийсас Ӏаьдала бокъонаш лархӀара тӀахьийхар бахархой. МВД ГИБДД оагӀон кулгалхочун гӀонча волча полице полковника Зурабанаькъан Султана белгалдир, наькъашкара бокъонаш лархӀар тахан керттерчарех да, аьнна. Россе МВД ГУ СКФО юкъарча совета доакъашхо волча Гаданаькъан Мусас дийцар, полице балха отта безам барашта; шоаш гӀо дергда, аьнна.

Иштта цо хьалхадаьккхар бахархошта, малашб ца ховча нахаца бувзаме дувлаш, интернете гӀолла шоашта тийшаболх ма байта, фийла хила, аьнна. Тахан баьржача зуламхоша, интернете гӀолла нах Ӏехабеш леладеш дола хӀамаш белгалдеш, каьхаташ дӀадийкъар полице болхлоша бахархошта. МВД болхлоша бахархошца дӀакхухьача иштта йолча кхетачеша боккха пайда бу тахан, цудухьа каст-каста уж дӀакхахьар лоархӀаме да вайна массанена.