Къаман проекташта лаьрхӏа, Гӏалгӏайченна хьахьожадаьд 6 миллиард совгӏа ахча
Къаман проекташ йоаржаяра болх лакхача боараме дӏахьош ба мехка, хӏаьта цу гӏулакха къоастадаь хьахьожадаь ахча 6 миллиард сомага кхоачаш да тахан. Лоархӏаме декхараш кхоачашдара тӏехьа, республике доккхий хувцамаш дара оагӏонца дӏадохийташ да иззал ахча.
«Цу балха тӏахьожам лоаттабеш ва со хӏара денна. Хӏара кӏира дӏакхухьача Паччахьалкхен кхетаче белгалду, къаман проекташ йоаржаяра тӏехьа кхоачашдаьраш. Таханарча дийнахьа цу оагӏонцарча балхах дӏадахар 2, 7 млрд гаргга рузкъа да. Шера хьахьожадеча ахчах 47% я из. Лоархӏаме долча гӏулакхашта дӏадохийташ да ахча: дешара оагӏонна, наькъашта, ЖКХ дувзаденнараш меттадоаладара тӏехьа, иштта дезлашта гӏо деча, кагирхой проекташ йоаржаеча. Россе Президента мехкара миӏингаш хьаллоацаш деш доккха новкъостал да из», - яздир ший Телеграм-оагӏон тӏа вай мехкадас Келаматанаькъан Махьмуд-ӏаьлас.
Республикан кулгалхочо белгалдир, паччахьалкхено гӏо деш хиларах, тахан дешара моттигаш, берий бешамаш хьалъе, наькъаш тоаде, ЖКХ оагӏонцара балхаш кхоачашде аьттув боалилга. Иштта мехка салаӏа, бахархошта ха дӏаяхьа моттигаш тоае, къонабарий гӏулакхага хьажа, бахархошта новкъостал де таро я вай тахан.
