Федеральни ганзера ахча хьожадергда ОКН меттаоттае
Санкт-Петербурге дӀайихьача Къамашта юкъерча культуран гӀулакхех йолча кхетаче, РФ Президента Путин Владимира белгалдир, культуран оагӀонца дувзаденнараш меттаоттаду болх беш йоккха программа хургйолга. 3000 совгӀа цу оагӀонца дувзаденнараш дисад вай лоаман моттигашка. «САФМАР» яхача Гуцаранаькъан Микаила ганзо лоамашкара гӀалаш меттаоттаеш боккха болх дӀаболабаь диъ шу да. Из хоам «Сердалога» бир Мехкадаь зарбан болх лелабераша.
Таханарча дийнахьа меттаоттаяьй Бишта, Ний, Морча, Хьарпа, Пхьуй, Эбана, Келе гӀалаш. Белгалде деза, паччахьалкхен программа юкъеяккхаро из болх кхы а дикагӀа тоабергболга. Федеральни рузкъах эггара хьалхарча мугӀаре тоае лерхӀараш я ВӀовнашаке, Тхаба-Ерд яха моттигаш.
«Уж меттаоттае аьнна федеральни оагӀоно хьахьожадаь ахча 50 млн сомага кхоачаш да. Тохкама балхаш дӀахьош латт цига карарча хана», - йоах тхогарча хоамо.
«Селханарча истореца дувзаденнараш лакха лоархӀаш хиннад Россе массахана. Из иштта долга хьагойтар тахан Президента Путин Владимира. Культуран оагӀонца ювзаенна моттигаш меттаоттаяра тӀехьа юкъеяьккхар йоккха программа я. ТӀехьа тӀабоагӀарашта йовза еза шоай даьй вахарера гӀалаш. Уж меттаоттаеш бола болх дӀабахьар дикка аттачахьа боаккхаш, цу балхацара безам чӀоагӀбеш да из гӀулакх», - белгалдир вай Мехкадас кердача программах дувцаш.
