«ДӀадахача шера 43 саг балха эттав «Земски лор» яхача программах. Юрташкарча унахцӀенон моттигашка, масала, Эккажкъонгий-Юрта, Эбарга-Юрта, СоагӀапча, Инаркъе, Долакоа, Илдарха-ГӀалий тӀа, кхычахьа дукха къона говзанчаш баьхкаб болх бе.

Вай республике хьалъеш латт унахцӀенон керда гӀишлош, таханарча дено дӀадеххача беса дола гӀирсаш оттадеш латт цига, иштта кийчъеш я поликлиникаш, юрташкара амбулатореш. Вай лорашта из доккха новкъостал да», - аьлар республикан кулгалхочо Келаматанаькъан Махьмуд-Ӏаьлас, цу даькъ тӀа карагӀдаьннар дувцаш. Цо белгалдир, из программа хилар бахьан долаш, къонача лорий таро я премеш а кхыдола балха тӀа луш дола ахчаш а хьаийде, царна цунах доккха новкъостал а хул, юрта вахара аьттув ба из.

«Земски лор» яхача программан гӀонца дика кхоачашде таро хул моттигаш лорашца Ӏалашъяр. Россе Президента Путин Владимира хьалхашка оттадаь декхараш дика кхоачашду, юртарча дарбанчешка лорашца Ӏалашо яьй. Карарча хана из программа кхойттазлагӀа кхоачашъеш я. Цу юкъа 343 саг балха оттаваьв. Махьмуд-Ӏаьлас белгалдир, «Земски лор» яха программа хиларах, унахцӀено лораеча говзанчаш хургбола, мехка бахархошта новкъостал лоаттадергдола дешаш кхоачашде таро хул.