Хоржамашка кийчо еш, къахьегама шоатта дIадихьар Алхасте
Россе Паччахьалкхен Думан, Халкъа Гуллама хоржамашка кийчо еш, боккха экологически болам дIабахьа арабаьлар Алхасте. Культуран цIен, моттигерча администраце болхлой къахьегама шоатта доаржадеш хилар юрта.
«ХIара денна дукха адам тIалатташ йолча моттигий доазонаш тIа кулг тохар, лостам бар дар лоархIаме. Iаламах, экологех дог лазаш бола нах ба из гIулакх доаржадераш. Къаьстта терко йир кагирхой, бераш тIалаттача спорта моттига. Гаьнашта кIир тохаш, йокъаенна йоархIаш дIайоахаш, массанахьа нув хьокхаш, къахьийгар болам дIахьош хиннараша.
Белгалде деза, из болх тахан вайх хIаране вахаре лоархIаме моттиг дIалоацаш болга. Шоаш бахача моттига доазон тIа каст-каста кулг тохаш, лостам беш хила беза бахархой, цар декхар да из», - дийцар «Сердалога» Алхастерча культуран ЦIенна кулгал деча Боканаькъан Заретхана.
Хоржамаш хьатIадоагIача хана, геттара лоархIаме да иштта болх боаржабар, хIана аьлча дукха адам арадаргда цу деношка. Спорта моттига ков, лостам баьчул тIехьагIа, ший тайпара дар. Хоржамий деношка Алхастера бахархой гуллуш йола моттигаш хоза, бIарг тIаотташ хургья.
