Гӏалгӏайчен халкъа пхьараша шоай начӏал гойтар Севастополе
Тамашийна культуран тӏехьале гойтар Россе Къулбехьен къамий культуран, спорта ХХӏV Фестивале, из дӏахьош яр Севастополе. Начӏал долча халкъа пхьараша цига дӏахьош хиннача ярмарке гойтар Гӏалгӏайчен культуран мах бараш, «Къаман коа тӏара боахам. Россе Къулбехьен къамаш» яхача даькъе.
Гӏалгӏайчен гойтамга хьажа эггара дукхагӏа нах хьаухар. Геттара чӏоагӏа хоатташ хиннар дар говзанча-хьехамаш дӏадахьар, уж дӏахьош бар гӏалгӏай начӏал дола нах. Безам барий таро хилар цар беча балхага хьажа; говзанчаша хьехам а беш, шоашта фу карагӏдоал ха»,- аьлар «Сердало» газетага Гӏалгӏайчен халкъа кхоллама, культуран дукхача наха дакъа лоаца кхетаченаш дӏаяхьара республикан Цӏен кулгалхочун гӏончас Котанаькъан Марема.
Ший дикагӏа бола болх ярмарке гойтар декоративно-прикладной искусствон говзанчас, Гӏалгӏайчен РДНТ этнографе отдела методиста Цӏолой Заремас. Иштта цига терко тӏаэзар цӏихезача кӏувсаш деча ӏоахарганаькъан Райшата балхо а. Цун фертай кӏувсаша, къаман гахьара хозал тӏайолча истингаша гойтама еррига моттиг сийрдаяьккхаяр. Хӏара хьожаш хинна саг таро йолаш вар, ноахалгара ноахалга йоалаш хьайоагӏаш йолча цун говзала мах оттабе.
Дикка белгалбоалаш хилар тӏоарска гӏирсаш деча Тӏумхой Ӏийсай болх. Цун балхаш даьд дикагӏча кепара гӏалгӏай ӏадатий кӏийлен тӏа, къаьнара балха технологеш юкъейоалаеш тоадаь да тӏоарска. Иштта дика болх гойтар Атиганаькъан Беслана. Из ва топпара пхьегӏаш еш, цо ший балха дакъа довзийтача хана, дуккхабараш цецбувлар цун хозалах.
Гӏалгӏайчен пхьараша цу фестивале дика дакъа лацаро цӏаькха тешал дир, Гӏалгӏайчен ӏадаташца, кулгаговзалца дувзаденна начӏал лорадаь ца ӏеш, дегӏадоагӏаш а хилар.
