Тха болхло белгалйир «Невский Александр» орден яларца
«Невский Александр» яха орден луш, белгалбир цӀихезача журналиста Батайнаькъан Хьавай къахьегама никъ. Дуккхача шерашка денз журналист йолаш, болх беш хьайоагӀа Хьава. Пригородни кхале эрсий, гӀалгӀай, хӀирий меттала аоадувлаш хиннача газете къахьегаш дӀаболабелар цун кхоллама бӀаьха никъ.
1992-ча шера эттача хатарах цигара араяьлча, «Сердало» газете дӀахохьу цо ший журналиста болх. Цун вахара наькъ тӀа дукха цӀихеза журналисташ нийсбелар, царгара ший кхоллама наькъ тӀа накъадаргдараш хьаэцаш дӀахобихьар цо ший болх. Тахан цар цӀераш хьоахае лов: Осменаькъан Микаил, Къоастой Башир, Хамхой Мустафа, Ӏарчакханаькъан Сали, Озанаькъан Мурад, иштта гӀалгӀай журналистике дошо догамца цӀераш дӀаязъяь латта дукха кхыбола журналисташ.
Къаман вахаре доккха дакъа дӀалаьца, хьинаре, бехктокхаме ший болх дӀахьош хьайоагӀа Батайнаькъан Хьава укх массехк шера.Къаьстта боккха лерхӀам болаш я цо гӀалгӀай паччахьалкхен телевидене дӀахьош йола «Наьна мотт» яха, гӀалгӀай мотт лорабарах йола передача. Тахан вайна массанена хоза хеташ, лакха лоархӀам болаш передача я из. Тайп-тайпарча оагӀонашка къахьегаш, ше хьаийца никъ безаш, хьайоагӀа журналист. «Сердало» газета ерригача тоабо даькъалаювц Хьава из лоархӀаме совгӀат даларца! Беркате, иразе, хьинарах бизза хилба цун къахьегама никъ дӀахо а!
