Ӏилман кхетаче, поэзен сайре дӀайихьар ИнгГУ, наьна метта ди долаш
Халкъашта юкъера наьна метта ди - из ший белггала дола ди да, цо хьалхадоаккх вайна культурни тӀехьале лораяр, из дегӀайоалаяр мел лоархӀаме да. Карарча шера ГӀалгӀай паччахьалкхен университета лаьрхӀар, белгалдеш дола из ди чу а лоацаш, гӀалгӀай къаман хетаяь ши тема цхьана дӀаяхьа, аьлар «Сердало» газетага республикан керттерча вузе.
«Университета гӀалгӀай метта кафедро, Ӏилман- практически «ГӀалгӀай мотт лорабар, дегӀабоалабар» яха конференци дӀайихьар.
Цу кхетачено новкъостал дергда Ӏилманхошта, хьехархошта, студенташта юкъе балха говзал Ӏомае»,- аьлар тхоца къамаьл даьчо.
Кхетаче дийцар гӀалгӀай мотт лорабарца дувзаденна хаттараш, иштта цо дӀахойодача ханашка дӀалаца езача моттигах. Цунна юкъе дакъа лоацача гӀалгӀай метта хьехархоша шоай балха говзал йийкъар, хьалхашка латта декхараш кхоачашдара цхьацца дола кердадараш белгалдир.
Университета юххьанцара дешар хьехача кафедро гӀалгӀай поэзен сайре яхача кхетачен юкъе дакъа лаца бийхар безам бараш, цига таро хилар поэзега гӀолла гӀалгӀай къаман истори, культура йовза.
