Коталон аллея тоае лерхӀ
10.01.2025 09:10
«Туризми хьаьша тӀаэцара гӀулакхи» яхача къаман проектага гӀолла, Коталон аллея куц эргадаккха кийчлуш ба Наьсаре. Из хоам «Сердало» газетага бир цигарча викалаша.
Котало яьккха 80 шу дузаргда укх шера. ТӀемхошта дегӀача сийленга юхе, Сийлахь-боккхача Даьймехка тӀема юкъе хиннача вай бӀухошта, иштта тӀема операцен юкъе вахар хаьдача мехкахошта хетаяь, хоамий стендаш оттаергья. ГӀандаш, нувхаш чутувсаргаш хувцаргья аллее, керда кхуркхолг бергба.
Уж деррига балхаш, бӀаьстан шоллагӀча бетта 1-гӀа ди тӀакхачале, йистедаьха хила дезаш да. ЛоархӀаме цӀай тӀаэттача дийнахьа; бахархой, тӀабаьхкача хьаьший бӀарг гӀадбугаш хила дезаш да аллея сурт.
