ТӀеххьара гургал техар республикерча ишколашка
ТӀеххьара гургал бийкар тахан 9-ча, 11-ча классашкара дешархошта. Республикерча ерригача ишколашкара лакхерча классашка даьгӀа бераш кердача новкъа гӀа баккха даькъаладувцаш ди дар тахан. Наьсарерча №1 йолча лицее цу гӀулакха хетаяь йоккха кхетаче хилар. Из хоам «Сердалога» бир цу моттигерча болхлоша.
«Дега боча йолча ишколаца, Ӏадика ювца атта дацар берашта. ДӀахо царга хьеж керда, доккхий наькъаш. Вахаре шоаш лелабергбола болх харжа безаш ба уж, дикка кийчо е еза экзаменашка. Лицее баьхка хилар паччахьалкхен хьалхарча гӀончаца къахьегаш вола ТӀоаршхой Амир, дешареи Ӏилмани гӀулакхах йолча министерствера болхлой, лицее деша ваьгӀа Наьсарен кхален прокурор Овшанаькъан Руслан», - йоах тхогарча хоамо.
Хала дар берашта шоллагӀа цӀа хинна лаьттача моттигага Ӏадика ювца, цхьабарий бӀаргех дувлача хих гуш дар, къастар царна атта доацилга. Лицее болх беча ГӀазданаькъан Мурада майдилгаш, кубкаш, грамоташ йийкъар белгалдаьннача берашта.
«Сагото да тахан хьехархошца Ӏадика ювцаш! Шераш дӀадаха, университет яьккха яьнна, кердача новкъа яргья со, Дала аьннадале, бакъда, сайца деша баьгӀараш, сайна хьийхараш цӀаккха а бицбергбац аз. Аьттув болаш, мехка накъабоалаш, дӀахо дӀабаха низ хилба массане. Дагалаттар кхоачашхилда, иразе хилда керда вахар!» - аьлар 17 шу даьннача Местой Лейлас.
