«Ишколе даха кийчде бер» яха болам хьаллаьцар мехкарча СКР эпсараша
Россе Тохкама Комитета вай мехкарча оагӏон болхлоша дог хьаьстар, ишколе долхача берий. «Ишколе даха кийчде бер» яхача болама юкъе дакъа лаца эттар уж, цу оагӏон кулгалхо волча Асхабов Ахьмада хьалхадаьккха. Цу моттиге къахьегаш болча кхалнаьха низаца, толашагӏа бола 50 тӏормиг ийцар цар. Хьалхарча классашка болхарашта, иштта боккхагӏбарашта лаьрхӏа. Эшаш мел болча кхоачамца хьалдизар цар уж.
«Дешара шера тӏормигаш кийчдеча дакъа лоацаш хилар вай мехка зӏамига бахархой а, из дика хӏама хьаллаца ловш бар уж. Къаьстта терко йир РФ Тохкама Комитета вай мехкарча оагӏон къахьегамхоша тӏема операце доакъашхой, боккхача дезалий берашта, иштта РФ доазон тӏа декхараш кхоачашдеш болча тохкама оагӏон болхлой берашта а кийчдир совгӏаташ. Бераш дахача моттиге дӏаухаш, шоаш дӏадийкъар цар кердача, хозача хӏамаех дизза дола тӏормигаш. Кердача дешара шерца даькъалабийца, доккхача толамашка кхоачаш къахьегара, шоай даьй, ноаной дегаш хьоасташ, тӏехдика дешаш чакхбалара тӏахьийхар цар уж», - дийцар «Сердалога» мехкарча тохкамхоша.
Белгалде деза, цу оагӏонцарча болхлошта юкъе иштта дола беркате боламаш ӏадат хинна дӏаэтталга. Кхувш латтача къонача тӏехьен уйла еш, цар оагӏув хьаллаца, кердача наькъ тӏа гӏа баккха гӏо де ловш ба уж.
