«Кавказ» яхача федеральни наькъа тоаде дезаш диса 6 км доазув, укх шера тоаде лерхӀ
ФКУ «Кавказ» яхача федеральни наькъа оагӀон кулгал деча Лукашик Александраца, республикан паччахьалкхенна хьалхалаттача Сластенин Владимираца, мехкарча машеина наькъий министерствон кулгал деча Хаматхананаькъан Батыраца, иштта кхыболча мугӀарерча болхлошца кхетаче дӀайихьар вай Мехкадас. Кхетаче дувца оттадаь керттера дош дувзаденна дар, «Кавказ» яхача наькъа тоаде дезаш дисача 6 км доазонца. Из хоам «Сердало» газетага бир Мехкадаь зарбан болхлоша.
Ши шу да из моттиг тоаеш латта. Къаьстта цу наькъ тӀа дукха авареш хилар бахьан долаш, ма хулла сихагӀа, дикача боараме из болх йистебаккха аьнна тӀадиллар республикан кулгалхочо Келаматанаькъан Махьмуд-Ӏаьлас.
«Теша лов; из дош кхы вай дувца дезаргдац, аьнна. Тхоай оагӀорахьара эшаш дола гӀо дергда оаха, никъ тоабеш боахкарашта. Йиллача хана, боаггӀача боараме тоабаь латташ хила беза никъ», - белгалдир Мехкадас.
