Ший цIен юхегIа йолча набахта ха токхаш хургва лаьца воаллар
25.03.2024 13:21
Саратоверча набахта шийна Iаьдало теха ха токхаш вола вай мехкара вахархо, хIирий мехкарча набахта хьалвоалаваьв. Сага бокъонаш лораярах болча оагIон болхлочо Россе ФСИНе гIолла вIаштIехьадаьккхад из гIулакх. Из хоам тха «Сердало» газетага бир цу оагIон болхлоша.
«Сага бокъонаш лораярах болча вай мехкарча оагIон болхлошка, дехар дир лаьца воаллачун нанас. Къилбаседа Кавказерча набахта ший воI хьалвоалаве гIо де, яхаш, оарц дехаш яр из. ДегIа могашал эшаенна хиларах, гаьна лаьца воаллача воIа тIехьа аха низ бац цун, цудухьа из юхегIа хьалвоалавайта гIертар из», - дийцар тха газетага.
