Юрташкара, пхьешкара бераш чIоагIа раьза хул цIенача феца са доахаш, лоаман хозалца дог ловзаш цига сакъерда. ХIара вар цига кхача гIерташ хул. Укх деношка эттача хатаро, сов сиха юстарадаьккхадецаре, хоадабеш бар берий сакъердам.

ДIайикъаяр канализационни коллектор. ОарцагIбаьхкар къахьегамах йолча министерства болхлой. Цу министерства кулгалдеча МутаIаланаькъан Хьажбикара тIаэзар, из хатар юстарадаккха мел эшар.

«ГIаддаха лелача берий сакъердам ца бохабе, Iалаьмате чехка юстарадаккха дезаш хилар, из цIаьхха нийсденна гIулакх. Магасерча, Илдарха-гIалий тIарча администрацешкара йийхар оаха машенаш. Сиха оарцагIбаьхкача цар доккха гIо дир.

Канализационни коллектор цIенъйир гIишлонаш еш дIакъаьстача нувхехи полиэтиленови пакетехи. Уж тайпара нувхаши кулекаши цу чу мишта нийсъенний хьожаш, тохкама болх дIахьоргба лагере комиссе. Цул совгIа, берашца къамаьл дергда оаха, дIахо йодача хана, иштта дола хатар оттаргдоацаш», — аьлар къахьегамах йолча министерства кулгалхочо.