«Бейни» яхача чаьтарий лагеро гӀалгӀай мехка 300 совгӀа кагирхой тӀаийцар
ГӀалгӀай лоаме йовзарал совгӀа, гӀо деш хиларца шоай кхетам лакхбеш хилар «Бейни-2024» яхача ерригача Россе туристий дешара - чаьтарий лагерера кагирхой. Из хоам «Сердалога» бир цу гӀулакха хьалха эттараша.
«Массехк оагӀонах латта программа яр хӀара тоабанна лаьрхӀа вӀашагӀъелла. Маьтлоам тӀа бувлаш, гӀалай моттигаш тохкаш, Лаьжгерча кхуркхолгага хьажа ухаш, ха дӀайихьар кагирхоша. Геттара хоза хеташ дакъа лаьцар цар чӀаьпилг кечдеча балха юкъе, топпарах хӀамаш еча, ловзарашка, иштта кхыдолча гӀулакхашка», - дийцар тхога 3-ча хана юкъа (смена) кулгал деш хиннача Тебой Ахьмада.
Цига ваха хиннача республикерча Паччахьалкхенна кулгал деча Сластенин Владимира белгалдир, «Бейни-2024» кагирхой Ӏомабеш йола моттиг хиларал совгӀа, цхьана лоархӀаме болх дӀабахьа уж вӀашагӀтеха доазув долга. Цига цар дувцаргда шоай кхоллама проектех, де лаьрхӀача гӀулакхех, из деррига мишта кхоачашде йиш я.
