Россе яхьашка дикка толамаш даьхар панкратиона латархоша
Сочи дӀайихьача яхьашка дикка белгалбаьлар вай панкратиона латархой. Из хоам «Сердалога» бир спортацарча латарах йолча федераце.
«Россе 30 моттигера гулбенна спортсменаш шоай низ гойташ бар, ше-ше котвала гӀерташ. Тайп-тайпара майдилгаш яьхар 250 спортсмена юкъе хиннача вай ялх мехкахочо. Виъ саг эшавир 66 кг дозал долча Элжаркъанаькъан Мухьмад-Амина, Санкт-Петербургерча спортсменагара котало яьккхар цо, 12:2 йолаш. Россе кхозза белгалваьнна чемпион ва из хӀанз», - дийцар тха газетага.
ШоллагӀча лагӀа тӀа ваьлар лакха говзал йола панкратионист Дзайтанаькъан Апти. Иштта борза майдилгаш йоахаш белгалбаьннарех бар Хамхой Адам (56 кг), ХьажкӀенаькъан Мурад( 57 кг), Ужахьанаькъан Заьлмаха (71 кг), Хаматханаькъан Илез (66 кг).
Респбликерча спортацарча латарах йолча федераце вице-президент, панкратионах йолча тоабан воккхагӀа тренер волча Гаьгенаькъан Башира белгалдечох, котбаьнна панкратионисташ Сербе дӀаяхьа лерхӀача дунен Чемпионате дакъа лаца йиш йолаш хургба.
