«Росгварде Наьсарен бIун воккхагIа вола сержант Дзейтанаькъан Хьасан велар тIем тIа лозаваь хинна ший новкъост моастагIчун гонна юкъера аравоаккхаш. Российски Федераце Указах, росгвардейца Денала орден елар, валарца аьнна белгалдаь. Турпалхочун парта тIа цун сурт а да, иштта цох бола хоам а цун тIема никъ а язбаьб», - йоах хоамо.

Цу дагалоаттама кхетачене дакъа лоацаш хилар; цунца тIема гIулакх дIахьош хиннараш, хьехархой, дешархой.

ГIалгIай метта хьехархочо Гаьгенаькъан Тамарас, ишколе кхетам баларах дувцаш, аьлар; из зIамига волча хана денз а, денал долаш, эхь-юхь долаш, къахьегама тIера волаш вар, аьнна.

Аз доаккхал ду из сай дешархо хиларах, массаза а из вовзийтаргва аз кхувш йоагIача тIехьенна, цунгара масал эцаргдолаш. Ер парта доаккхал де йиш йолча сага оттаяьй, цо вай лаьтта машар оттабара дIаденнад ший вахар», - аьлар цо.

Дзейтанаькъан Хьасанаца тIема гIулакх Iомадеш хиннараша иштта белгалдир, из денал долаш хинна хилар.

Цар дег чура баркал аьлар цун даьшта, из иштта, ший мохк безаш, Даьхенна хьалхара са Iодилла кийча волаш кхеварах. Росгвардейцах болча дагалоаттама сийна хетаяь минот а хилар. Турпалхочун парта тIа хьалхарча аргIагIа Iоховша пурам делар ишкола дикагIа болча дешархошта.