Журналистий  а  кепайоазон кхыча болхлой а цӀайца дувзаденна, Руслана Маринас доккха баркал аьлар Курскенаькъан Хадижатаи «Сердало» яхача кепайоазон цӀен берригача болхлоштеи, шоашца айхха бувзам лоаттабарах. Цо яхачох, гӀалгӀай газетий редакцешка даим  а болх беш хиннаб  къахьегама тӀера, шоаш караийца гӀулакх дезаш бола дика нах.

«ДӀахо а, кепайоазон Ӏадаташ лорадеш, хьадоагӀа «Сердало»,   «Хьалхарчар боламцара» бувзамаш чӀоагӀдеш, кагирхой еррига проекташ хьал а лоацаш, республике хулаш дола лоархӀаме хӀамаш наха дӀа а довзийташ. Таьрахьашка доала зама яле а, шо тешаме да оаш хьабахьача наькъа, вахара массадолча даькъаца дувзаденна хоамаш наха юкъе шерра доаржадеш.

 ЦӀенача дег тӀара лов тхона шун болх дика дӀабахар, наьха теркам тӀаоза йоазош оаш дар, балха тӀа коталонаш яхар. ХӀара шун йоазув наха йӀовхал, бакъдар, сердал яхьаш хилда», - аьлар Албохчанаькъан Маринас.