Даьхен лорабой дезалий Комитета хьалхара кхетаче дӏахьоргья вай мехка
Укх бетта 9-10-ча деношка Даьхен лорбой дезалий Комитета хьалхара куран кхетаче дӏахьоргья мехка. Тӏемхой дезалаш, хьакимаш, юкъарча оагӏон викалаш, иштта кхыбараш вӏашагӏтоха кхетаче хургья цох.
«Кхетачен балха юкъе хургва вай мехкада Келаматанаькъан Махьмуд-ӏаьла, КСВО федеральни штаба кулгалхо йола Белехова Юлия, иштта мехкарча тайп-тайпарча моттигашкара болхлой хургба цига. Кхетаче дувцаргда цу оагӏонцарча керттердарех. Цун программанна юкъе ба юридически секце «Правомобил КСВО» болх. Цу оагӏонга гӏолла КСВО доакъашхошкара, прокуратурагара, суда пирстопашкара, адвокаташкара, Вахара оагӏонцарча ганзагара, сага бокъонех волча викалгара, берий гӏулакхех волча викалгара гӏо деха йиш йолаш ба тӏемхой дезалаш», - дийцар «Сердалога» вай мехкарча Комитета штаба хьалха латтача Эсамарзанаькъан ӏалаудина.
Даьхе лораеш латтарий, цар дезалий вахарера кхоачамбоацараш меттадоаладара тӏехьа аьттув болаш да цу юкъе хьакимаша, ӏаьдала болхлоша дакъа лацар. Цу наьха вахара хьал аттачахьа даккхар тахан керттерча декхарех да. Кхетачен культуран оагӏонца цӏихезача пхьарий балхаш довзаргда гуллама доакъашхошта, иштта артисташ а хургба цига дакъа лоацаш.
