Региона Парламента, ГIалгIай Республика Халкъа Гуллама политикахи, Iалама махбараш леладараи йолча комитета кулгалхочо Пхьарчанаькъан Мухьмада кулгал а деш дIайихьача, яьржача, совещане дийцар региона лаьтташ ма хулла пайда дукхагIа лургболча оагIорахьа тоадара хаттар.

Цу лоархIамеча кхетаче иштта, дакъалоацаш хилар министра гIонча Iарчакханаькъан Ахьмад, экологически кхерамзлен, гонахьарча Iалама урхален кулгалхо Баркинхой Адам, ГIалгIай Республика Парламента депутаташ, иштта ГIалгIай Республика министерствай, ведомствай викалаш.

Укхаза дийца керттера дош дар, доазон тIара лаьттанца дувзаденна хьал тоадар, кхоачамбоацараш юкъедаьнна дадийса лаьтташ керда дахар, уж мелад а хьожаш, царна боагIаш бола мах а оттабеш, ма хулла, цу тIара эцаш бола пайда совбаккхара къахьегар, дIатохаш дола хиш а, лерттIа, Iалашо йолаш хургдола болх дIабахьар.

Баркинхой Адама юкъедоаладир ишколаш, берий бешамаш хьалъеча даькъа тIара, наькъаш тоадечара хьалдоахаш дола лаьтташ, тIера хьалъэцаш бола хьаьна, лаьттана оаса, лаьрххIа йолча моттиге, лорабеш хилча бакъахьа дар, аьнна.

Говзанчаша яхачох, гIишлонаш хьалъеча хана, лаьттан тIара хьалъэцаш бола хьаьна оаса кхыча лаьттах дIакхийтача, цун дикал йов. Цудухьа из лаьтта лаьрххIа йолча моттиге хьагулдаь, из лораде моттиг вай хьаяро, таро хулийтаргья лаьтташ кIаьддеш, хьаьндеш йолча хана, из дIа а тохаш лаьтта тоаде, вай республика дукха лаьтташ меттадоаладергда цо.