ФСБ погранични урхаллено бӀухой тIема гIулакха тIара мукъабалийтар
ГӏалгӀай Республике гӀолла йолча Россе ФСБ погранични урхаллене, лаьрххӀа йола кхетаче хилар, из хетаяь яр 2024 шера гурахьа амал де тIахьийха бӀухой тIема гIулакхах мукъабалийтара. Шоай ха тӀехдика яьккха бола пограничникаш Ӏадика ювцаш бар тӀема даькъца, кулгалхочо хьехам беш долча дешашца накъабаьхар уж.
Селхан мара ца хилча санна хеташ дӀаяхар амал дара йилла ха, цар керда говзал Ӏомайир паччахьалкхен доазонаш лорадеча, иштта мах баь варгвоаца балха говзал караерзайир атта доацача хьалашка, лоаман моттигашка гIулакх дӀахьош.
Урхаллен кулгалхоша баркал аьлар царна, шоай тӀема декхар дика кхоачашдарах, лакха бехктокхам болаш, амалцара гӀулакх лоархӀаме долаш шоаш хилар цар хьагойтарах, юкъарлон кхерамзлен Ӏалашо яра даькъ тӀа цар доккха дакъа юкъедарах.
Доазон тӀара тIема гIулакх - из ший тайпара дола вахар да, из хетадаьд хьамсара мохк паргӀата хургболаш, дегӏабоагӏаш хилийтара дӀахо а. Амал даь ваьнна, цIаводача цхьан бӀухочо аьлар шийна хетар: «Амал дар тайп-тайпара дар, дика а дар, ха а дӀайодар мишта яхар ца ховш. Дукха кийчо йир оаха балха даькъ тӀа. ГӏалгӀайчен лоамаш дагахьа латтийсар».
Цо иштта белгалдир балха даькъ тӀара дика хьалаш, чам болаш даар лоаттадар, раьза волаш вар из ше цига дӀайихьача заманна.
Халонех дувцаш, цо аьлар, мехкал (климат) хувцалуш хилар хала дар: «Керттера хало яр моттигера мехкал, ахкан замах дӀайха, лакхаленашка хувцамаш долаш дар. Иштта дале а, ха дӀа мел йода дӀаӀемар со, иштта новкъосташа а гӀо дир».
Цо белгалдир, ше цига дӀайихьача хана дукха новкъостий ший хьахилар, цунца амал деш хиннаб берригача мехкара нах, цар чӀоагӀа барт болаш тоаба хиннай, боккъонца бола новкъостий.
Цига цар Ӏомадаьр накъадаргда, дӀахо вахар дӀахьош. Бӏухой тӏахьехам ба Даьхе лораяр, хӀанз уж ба доккхача доазон барт-цхьоагIон цхьа дакъа.
