«Истореца бувзабенна боккха никъ хьабахьаш воагӀа саг ва хьо, дӀаьхача шерашка. Боккхача тӀема юкъе дакъа лацар, цул тӀехьагӀа, тӀом дӀабаьлча, деррига вахар меттаоттадеш къахьегама никъ дӀабахьар - из деррига дукха низ, сабар, денал эшаш хӀама да», - йоах цо дайтача каьхата тӀа. Чайка Юре белгалду, Медаранаькъан Мухьмад, Россе вахар тоаде гӀерташ, дуккхача халонашта духьалъувтташ, хьабаьхкача нахах волга. Тахан кхувш латтараша масал эца дезаш, доаккхал де дезаш саг ва из. «Баркал хилда хьона Ӏа мел даьчох! ВӀалла а текха даргдоацача декхарийла ба хьона хьалхашка беррига россиянаш. Могаш, маьрша волаш, иразе вахалва хьо хье везарашта юкъе!» - йоах Чайка Юре, ше дайтача каьхата тӀа.